Nu 5. da 15. oktobra jau catūrtū reizi Daugovpilī nūtiks Storptautiskais Latgolys grafikys simpozejs, kū reikoj Daugovpiļs Marka Rotko muokslys centrys sadarbeibā ar Muokslu pedagogu apvīneibu. Grafikys simpozeja mierkis ir radeit unikalus laikmeteiguos grafikys dorbus, veidojūt storptautiskuos komunikacejis platformu grafikys muokslys nūzarēs.

Kai informej Daugovpiļs Marka Rotko muokslys centra puorstuovi, Latgolys grafikys simpozejs ir sasatikšona, diskuseja i rodūšs dorbs Latgolys kulturys telpā, kas vīnoj leidzeigai i atškireigai dūmuojūšūs i struoduojūšūs Latvejis i uorvaļstu grafikus. Simpozeja vīnuojuošuo tema itūreiz ir “nauda”, analizejūt tuos vierteibu transformacejis laikā i telpā, tuos varu i ari pūstu.

4. Storptautiskajā Latgolys grafikys simpozejā pīsadaleis 11 muokslinīku nu Dānejis, Indejis, Italejis, Latvejis, Lītovys i Šveicis: Anne Louise Blicher, Ann Kerstina Nielsen, Prasad Nikumbh, Alberto Balletti, Īva Caruka, Duorte Hofmane, Juoņs Murovskis, Rūdolfs Mateiss Trops, Oksana Vronska, Žaneta Jasaitytė, Senso.

Vysi interesenti ir aicynuoti apmeklēt simpozeja pasuokumus i īsapazeit ar storptautiski atzeitu grafikys muokslinīku daiļradi sasatikšonys, prezentaceju, meistarklašu i izstuodis formatā.

Grafikys simpozejs tiks atkluots 6.oktobrī 16.00. Atkluošonā byus vareiba satikt vysus IV Storptautiskuo Latgolys grafikys simpozeja dalinīkus i pīsadaleit muokslinīku rodūšuo dorba prezentacejuos. Simpozeja ītvorūs byus vareiba dasasaceit daleibai grafikys meistarklasēs i apmeklēt sasatikšonys ar Latvejis i uorvaļstu grafikys muokslys organizaceju i bīdreibu puorstuovim.

Simpozeja nūslāgumā 14. oktobrī 16.00 tiks atkluota IV Storptautiskuo Latgolys grafikys simpozeja izstuode “NAUDA” i Latvejis laikmeteiguo muokslys centra ceļojūšuo izstuode.