Viļānūs apsaverama Osvalda Zvejsaļnīka dorbu izstuode
Da 12. decembra Viļānu nūvodpietnīceibys muzejā ir apsaverama Osvalda Zvejsaļnīka gleznu izstuode.
Gleznuotuojs, Treju Zvaigžņu ordiņa kavalers, Rēzeknis Gūda pylsūņs, Latvejis Muokslys akademejis profesors, Rēzeknis Muokslys i dizaina vydsškolys direktors Osvalds Zvejsaļnīks vys aktivi i energiski īsasaista vysaiduos kulturys aktivitatēs, dūdūt byutisku ieguļdejumu muokslys izgleiteibys, Latgolys gleznīceibys i Latgolys kulturys atteisteibys jūmā.
Osvalds Zvejsaļnīks dzims 1944. goda 21. martā Varakļuonūs, beidzs Latvejis Muokslys akademeju, nu 1976. goda ir Latvejis Muokslinīku savīneibys bīdrs. Nu 1970. goda struodoj Rēzeknis lītiškuos muokslys vydsškolā, vāluok ir Rēzeknis muokslys koledžys direktors i Muokslys akademejis Rēzeknis filialis vadeituojs. Itūšaļt – Rēzeknis Muokslys i dizaina vydsškolys direktors, Latvejis Muokslys akademejis Latgolys filialis profesors.
Nu 1971. gada pīsadalejs vaira kai 60 nūvoda, vaļsts i starptautiskajuos muokslys izstuodēs, sareikuojs ap 20 personalizstuodem, regulari pīsadola starptautiskajūs plenerūs i grupu izstuodēs i Latvejā, i uorvaļstīs.
