Daugovpilī nūtiks kamerkora “Muklājs” koncerts “Ar laimeņu runojūt”

Daugovpilī nūtiks kamerkora “Muklājs” koncerts “Ar laimeņu runojūt”

Svātdiņ, 8. novembrī, Daugovpilī, Vīneibys noma koncertzalā, 15.00 kamerkors “Muklājs” īpazeistynuos ar izdūšonai sagataveitū latgalīšu dzīšmu disku “Ar Laimeņu runojūt”. Koncertā tiks atskaņuotys diskā īraksteituos i cytys latgalīšu dzīsmis nu “Muklāja” repertuara.

“Koč i tradicionali latgalīšu dzīsmis izpylda Latgolys kolektivi, tai nūdrūšynojūt sova nūvoda kulturys tradiceju saglobuošonu i populariziešonu, mes asam guojuši cytaidu ceļu. Reigys kamerkors “Muklājs” i latgalīšu dzīsmis ir sovpateiga muzykys savīneiba, kas akcentej latgalīšu tradiceju i muzykys kluotbyutni Latvejis kulturtelpā. Kora skaniejums ar itū repertuaru ir palics azartiski izjusts i kruosains ar sovpateigu volūdys i muzykaluo skaniejuma akcentu. Grybom, kab klauseituoji izprūt i saklausa Latgolys nūvoda byuteibu i autentiskumu,” Daugovpiļs piļsātys sātys lopā teik citāts “Muklāja” muokslinīcyskais vadeituojs Juoņs Kokins.

“Maņ kai dzymušam latgalīšam itys beja gūda dorbs vairuoku godu garumā, i niu ir daguojs laiks tū “palaist tauteņuos”,” dasoka Kokins. Ari kora dalinīku vydā ir vairuoki ar Latgolys saknem saisteiti dzīduotuoji, kuri radeja gribiešonu i motivaceju naaizmierst i popularizēt latgalīšu volūdu i kulturys daudzveideibu Latvejis kulturtelpā.

Albumā apkūpuotys vysaidūs laikūs radeitys latgalīšu tautysdzīšmu apdaris i originaldzīsmis. Vairuoku godu garumā itam nūlyukam eipaši dalaseits repertuars, tymā skaitā komponisti aicynuoti radeit originaldzīsmis latgalīšu volūdā. Eipašs, kamerkoram “Muklājs” veļteits skaņdorbs, ir Agnetys Krilovys “Meitines dzīsma” ar Raiņa vuordim. Albumā ir īmyužynuotys latgalīšu dzīsmis J. Vaivoda, I. Rupainis, E. Skukis, V. Pūcis, J. Graubiņa, V. Rudušys, N. Vītinis i cytu komponistu muzykalajā interpretacejā. Kamerkors “Muklājs” lepojās, ka albumā īkļauta ari Latgalīšu kulturys bolvys “Boņuks 2014” nominacejā “Lobuokais snāgums akademiskajā muzykā” uzvariejušuo dzīsme – R. Dubrys “Tu skaistuo Dīva duorza rūze”.

Dzīšmu gors, pylns latgalīšu lepnuma i patriotiskuma, vīnojūša kūpeibys sajiuta, syltums i smeļdze sasaveis itymā koncertā.

Latgalīšu dzīšmu albuma “Ar Laimeņu runojūt” īraksteišonu atbaļstejs Vaļsts Kulturkapitala fonds. Koncertu atbolsta Daugovpiļs piļsātys dūmis Kulturys puorvaļde. Informacejai par diska izdūšonu var sekuot kora sātyslopā, Twitter kontā i Facebook lopā.

Reigys dūmis kulturys centra “Iļģuciems” kamerkors “Muklājs” ir dybynuots 1989. godā. Nu 2012. goda kora muokslinīcyskais vadeituojs i dirigents ir Juoņs Kokins, īprīšk tū vadeja kora dybynuotuoja Sandra Šmate. Kors ir vairuokkuortiejs Dzīšmu svātku koru karu laureats i storptautyskūs festivalu i projektu dalinīks. “Muklājs” ar panuokumim pīsadalejs storptautyskūs koru konkursūs vairuokuos vaļstīs. Pādejais nūzeimeiguokais kora sasnāgums ir izceineitais V pakuopis zalta diploms Pasauļa koru olimpiadis atkluotajā konkursā 2014. goda julī jauktūs kamerkoru grupā. Itūšaļt kora ryndys kuplynoj 32 dzīduotuoji. Kolektiva repertuarā ir skaņdorbi nu renesaņsis da 21. godusymta muzykys.

Īīšona koncertā bez moksys.

kamerkors muklajs

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
19:00 Grupys “Galaktika” albuma prezen... @ Kuldeigys kulturys centrs
Grupys “Galaktika” albuma prezen... @ Kuldeigys kulturys centrs
Apr 13 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]