5. novembrī 15.00 Latgolys Centraluos bibliotekys (LCB) Abonementā tiks atkluota muokslineicys i keramikis Vēsmys Ušpelis gleznu izstuode “Magones”, kura byus apsaverama da 5. decembra, informej LCB puorstuove Tatjana Hodokova.

Vēsma Ušpele dzeivoj Rēzeknis nūvoda Maltys pogosta Garkolnūs. Izviele saisteit sovu dzeivi ar muokslu tyka izdareita jau vydsškolys godūs. Piečuok sekuoja studejis Latvejis Muokslys akademejis Latgolys filialē, kur tyka sajimts muokslys bakalaura grāds.

Vēsma gleznoj tradicionalā ellis tehnikā iz audakla i kūka. Muokslys magistre Evija Vasilevska Vēsmys dorbus raksturoj itai: “Vēsmys dorbu gleznīciskais spāks ir dažaidu izteiksmis leidzekļu mierktīceigā lītuojumā, kurymā dominej rodūšais spāks, intuitivuos zynuošonys par gleznojamū tālu, vidi, objektim. Muokslinīciskuo vide Vēsmys dorbūs veidoj ekspresivu kruosu izlicīni, kurymā intensivai veiduota faktura mejās ar maigi izstruoduotu viersmu.”

Izstuodē “Magones” skateituoju īviereibai tiks pīduovuotys Vēsmys Ušpelis gleznys, kas attāloj dūmys i sajiutys, verūtīs iz mogonu zīdūšom pļovom. Kai soka poša muokslineica, mogona ir jiuteiga, trausla, natverama, kas dūd iztielei sova veida breiveibu. Muokslinīks it kai saplyust kūpā ar sajiutom, dūmom, kruosu, smuordu, telpu, laiku, rytmu i plakni.