Leivuonā byus apsaverama izstuode “Latgale laiku ritā”

Leivuonā byus apsaverama izstuode “Latgale laiku ritā”

Nu 14. novembra da 15. decembra Latgolys Muokslys i omotnīceibys centrā (Dūmis īla 1, Leivuons) byus apsaverama Šveicis muokslinīka Vincenta Flikigera zeimiejumu izstuode “Latgale laiku ritā”.

Šveicīšu muziks i muokslinīks Vincents Flikigers dzims 1975. godā Fribugā (Šveice). Preciejīs ar latvīti, takūšai runoj latviski i jau vaira nakai desmit godu regulari apmeklej Latveju, eipaši Latgolu. Paraleli profesionalai koncertdarbeibai jis regulari pīsadola Vyspasauļa zeimietuoju apvīneibys “Urban Sketchers” aktivitatēs. Grupā apsavīnuojuši muokslinīki, kas attāloj vidi sev apleik taidu, kaida tei ir. 2015. goda aprelī Ņujorkā tyka izdūta Vincenta pyrmuo zeimiejumu gruomota “Inside Salmeck”, kas izapeļneja kritiku augstu nūviertiejumu.

Muokslinīks pīduovoj dorbu izstuodi, kurymā vairuokūs zeimiejumūs atainoj lauku dzeivi Latgolā. Malnboltajūs zeimiejumūs, kurus komentej eisi teksti, radzams tys, kas diveju nedeļu apmekliejuma laikā uorzemu ceļuotuoju apbur Latgolys kasdīnys dzeivis ainā – saimisteibys prīškmati, tradicionaluos arhitekturys detalis i cylvāku portreti. Muokslinīks ar apbreina pylnom acim verās iz naparostū parostajā, kasdīniškajā i caur tū atspīgeļoj vys vēļ dzeivū tradicionaluos kulturys montuojuma kluotynasameibu Latvejis laukūs.

Karteņa: preili.lv

Print Friendly, PDF & Email

Nūtikšonu kalendars