Nacionaluo kulturys padūme paziņuojuse 2015. goda Izcileibys bolvys kulturā laureatus. Jūs vydā ari varganiste Iveta Apkalna.

Leidz ar Ivetu Apkalnu bolvys sajims ari animacejis kinu režisore Signe Baumane i scenografs Andris Freibergs.

Riezeknīte Apkalna ir vīna nu Eiropys aktivuokajom i pīpraseituokajom solo varganistem i vīna nu ratajom varganistem pasaulī, kurei par sovu miseju skaita vargaņu īskandynuošonu ari uorpus bazneicu myuru – kai breineigu koncertinstrumentu bez sakralys funkcejis. Ar muokslineicys naatlaideigu guodeibu pi sovu vargaņu tykuse ari Latgolys viestnīceiba GORS, tai rodūt pagaidom vīneigū vareibu Latvejis koncertzalūs kvalitativai atskaņuot muzyku varganem i orkestram. Apkalna izveidojuse ari jaunu festivalu “ORGANismi” Rēzeknē, kas itūgod nūtyka pyrmū reizi.

Muokslineica ir divkuortieja prestižuos “ECHO Klassik” bolvys laureate, juos rodūšajā biografejā ir sadarbeiba ar pasauļa lobuokajim orkestrim i dirigentim, tymā skaitā ar Marisu Jansonu i Klaudio Abado. Sovuos soloprogramuos Apkalna regulari īkļaun Latvejis komponistu skaņdorbus.

Izcileibys bolva kulturā tyka īdybynuota 2014. godā piec kulturys ministris Dacis Melbārdis aicynuojuma, Latvejis Rodūšūs savīneibu padūmis iniciativys i ar Nacionaluos kulturys padūmis atbolstu, kab gūdynuotu eipašus sasnāgumus ar storptautysku rezonansi i nūzeimeigu ītekmi iz kulturys procesu atteisteibu Latvejā.

Izcileibys bolva kulturā tiks padūta eipašā ceremonejā 7. decembrī J. Vītuola Latvejis Muzykys akademejā. Ceremonejis režisors byus Kārlis Krūmiņš. Laureatu gūdynuošona kotru godu planavuota sadarbeibā ar kaidu nu Latvejis kulturys augstškolom, itūgod – ar J. Vītuola Latvejis Muzykys akademeju.

Karteņa nu LaKuGys arhiva (autors: Māris Justs)