Nu 13. septembra da 20. novembra Latgolys regiona 8. – 12. klašu školānim beja vareiba pīsadaleit konkursā “Muna sāta, škola, pogosts/ piļsāta 1917.–2015. godi”.

Konkursa mierkis beja – apzynuot vītejūs, individualūs stuostus par spylgtuokajom nūtikšonom, personeibom dzymtuos, školuos, školu viesturē, pogostūs i piļsātuos, kas ruoda 1917. goda situaceju, tuos ītekmi i izmainis gondreiž 100 godu ilgā atteisteibys pūsmā.

Kai informej konkursa idejis autore, Rēzeknis Augstškolys zynuotņu prorektore Ilga Šuplinska, konkursā pīsadaleja 50 školānu nu 11 Latgolys školu. Konkursa nūlykums paredzēja, ka jaunīši sovu redzīni paruoda, veidojūt gazetu. Konkursam ir īsnīgtys 15 gazetys, kas tyka vārtātys divejuos klašu grupuos: 8. – 10. klase i 11. – 12. klase. Nūslāguma pasuokums nūtiks jau šudiņ, 27. novembrī, Rēzeknis Augstškolā, paziņojūt konkursa rezultatus, apbolvojūt uzvarātuojus.

Bolvys uzvarātuojim teik nūdrūsynuotys sadarbeibā ar Eiropys Parlamenta deputati prof. Inesi Vaideri, kura lobuokūs gazetu veiduotuojus 2016. godā aicynuos apmeklēt Eiropys Parlamentu Briselē, kai ari ir saryupiejuse cytys puorsteiguma bolvys konkursa dalinīkim.

Lobuokī konkursa dorbi tiks izmontuoti izgleitojūšuos datorspēlēs, kai ari dokumentala izdavuma veiduošonā par Latgolys apvīnuošonuos kongresu, sasaistūt itū viesturiskū faktu ar Latvejis vaļsts dybynuošonys i pastuoviešonys laika palīkūšajom i jaunajai paaudzei saglobuojamom vierteibom, dokumentim, līceibom.

Konkurss nūteik ar Kulturys ministrejis atbolstu programys “Latvijai 100” pasuokumu ītvorūs.