Kū varēja saklauseit Rēzeknis Augstškolys Andrejdīnā
Andrejdīna ir vīna nu stabiluokūs tradiceju Rēzeknis Augstškolā, itūgod tei nūtyka jau 17. reizi. Lasejumūs pīsadaleja 13 autori: Valentins Lukaševičs, Anna Rancāne, Ineta Atpile-Jugane, Raibīs, Betija Berga, Jurs Viļums, Ligeja Purinaša, Violeta Jašina, Dagneja Bramane, Līveja Liepdruviete, Leiga Čevere, Meldra Gailāne, Inga Kaļva.
Andrejdīnys pasuokuma laikā kluotynasūšajim beja vareiba īsapazeit i ar jaunuokim autoru dorbim, i atsvaidzynuot atmiņā jau īprīšk skaiteitūs voi dzierdātūs. Dalinīki prīcynuoja klauseituojus ar bārnu dzeju (I. Atpile-Jugane) i fabulom (D. Bramane), i ar miniaturom (L. Čevere, V. Jašina) i fragmentim nu garuoka detektivstuosta (Raibīs), nu kai parosti dominejūšais žanrs beja dzeja. Inga Kaļva, par pīmāru, skaiteja tekstus par cylvāku etiskajom vierteibom, dzeivis ritiejumu, Jurs Viļums par latgalīšu volūdys trauslumu i naaizsorguoteibu vīna cylvāka myuža garumā. Myužeigī byut i nabyut vaicuojumi vyrmuoja ari cytu autoru dorbūs.
Mes vysi bejom līcinīki tam, ka, atsateistūt tehnologejom, leidza mainuos ari cylvāku īrodumi. Kai? Autori sovus dorbus skaiteja na tik nu tik īrostūs pīrokstu klažu, lopu i gruomotu, nu ari nu telefonu. Izaruod, ka ari rodūšī dorbi niu rūnās myusu kuļdinīkūs!
Andrejdīnys Uoksta capuri itūreiz varēja sajimt sevkurs skaiteituojs, nabeja īrostuo jaunūs i labi zynomūs autoru sadalejuma. Lobuokūs nūsaceja klauseituoji. Kai pīzyna Andrejdīnys klauseituoji i poši dalinīki, tod uzrunojūšuoki beja veirīšu skaiteitī teksti, nu tai kai vysi veirīškuortys dalinīki jau ir Andrejdīnys Uoksta capuris eipašnīki, tod pasuokuma vadeituoja izaicynuoja najaušeibu i Uoksta capuri sajēme Leiga Čevere. Juodasoka, ka Leiga ir na tik filologejis magistra programys absolvente, nu sovu magistra dorbu ir paspiejuse izdūt gruomotā “Arhetipi un žanriskās iezīmes šausmu stāstos” (2014). Najaušeiba beja ari lykumsakareiba, partū ka Leigys proza beja izaicynūša, jutekliskai uzrunojūša.
Par muzykalū daļu pasuokumā pasaryupēja postfolklorys grupys “Rikši” samozynuotais aba koncentrātuo kūdula – Eriks Zeps, Zane Dukaļska – sastuovs. Jī na tik prīcynuoja ar sovom jautruom dzīsmem, nu ari izpraseja tū, ka gondreiž vysi aktivai izakustēja dejis laikā. Kūpā ar A. Spruktis šarmantū zeiļneicys tālu tī izbyure romantisku pyrma Adventa nūskaņu.
Andrejdīnys naiztryukstūša sastuovdaļa ir ari kaidys gruomotys prezentaceja, itūreiz kūpeigai tyka skaiteita i izspālāta L. Kerola “Alise Breinumu zemē”, kai ari skateituoju konkursi. Treis lobuokūs eisziņu autoris – profesore Sanita Lazdiņa, dzejneica Dagneja Bramane i filologejis magistra programys studente Ausma Sprukte – sovā eipašumā sajēme elektroniskū goda abonementu avīzei “Izglītība un Kultūra”.
Adventa mīru juonūvielej Andrejdīnu finansialajim atbaļsteituojim: Kulturys ministrejai, Rēzeknis Augstškolai i gazetai “Izglītība un Kultūra”.
Roksta autoris: Beatrise Jakobsone, Ilga Šuplinska
