Raiņa sātā Berkenelē atkluos jaunu ekspoziceju

Raiņa sātā Berkenelē atkluos jaunu ekspoziceju

9. decembrī 15.00 Daugovpiļs nūvodā, Raiņa sātā Berkenelē, atkluos jaunu ekspoziceju “Bērnistaba”, kas izveiduota sadarbeibā ar muokslineicu Kristiānu Dimiteri, i  interaktivi paleidzēs īpazeit Raiņa bierneibys laika dzeivis vidi i zynuošonu sajimšonys procesu, informej muzeja puorstuovi.   

Bārnustobys mierkis ir uzrunuot Raiņa sātys Berkenelē golvonū auditoreju – bārnus i jaunīšus ar saistūšu, myusu dīnu kulturvidei atbylstūšu kulturys produktu. Jaunajā ekspozicejā ir savīnuoti i senuotnis, i myusu dīnu elementi: senejūs laiku golds puortaiseits par interaktivu dorba viersmu, ar rūku tamburātuos lampys abažurs kustīs kai diskobumba, breinumskapī var redzēt vacus prīškmatus i cytys muzeja apmaklātuojim interesantys i originalys lītys.

Dizaina autore stuosta, ka ekspozicejis ideja suocēs ar grīstu noformiejumu, kur ir attāluoti dabasi, tymūs izkaiseitys zvaigznis, kas reizē atguodynoj ari pučis i kometys. “Es īsadūmoju, ka mozais Juoņs varātu apsaguļt zuoleitē i, verūtīs naksneigajūs dabasūs, dūmuot par sovu nuokūtni. Vērtīs iz nūslāpumainajim i varonajim dabasim i sepinēt par lītom, kū izpieteit i kai daleitīs ar sovu atkluojumu cytim,” stuosta K. Dimitere.

“Bērnistabas” ekspozicejis izveidei Raiņa sātā Berkenelē finansiejumu ir daškeiruse Vaļsts Kulturkapitala fonda mierkprograma “Latvijas valsts mežu atbalstītā Latgales kultūras programma 2015”. Pasuokumu cyklu “Vai atmini mani? Rainis” projekta ītvorūs atbolsta Vaļsts Kulturkapitala fonda mierkprograma “Raiņa un Aspazijas gads” i Daugovpiļs nūvoda dūme.

Ar daudzveideigu kulturys i muokslys pasuokumu pīduovuojumu itūgod tyka svieteits Raiņa i Aspazejis 150 godu jubilejs. Daugovpiļs nūvoda Kulturys puorvaļde dzejnīku jubileju atzeimuoja ar vairuokim nūzeimeigim pasuokumim. Raiņa sātā Berkenelē nūtyka pasuokumu cykls “Vai atmini mani? Rainis” četruos daļuos aba ainuos. Pasuokumu cykla nūslādzūšuos, catūrtuos dalis nūsaukums ir  “Vienīgā aina. Atminējums”.

Itamā dīnā Berkenelē gaisteis Valmīrys Dramys teatris ar izruodi “Bērns vārdā Rainis”, sovukuort  “Vienīgās ainas” meikli atminēt paleidzēs Bārnu i jaunīšu teatra studeja “Berķeneles kamolītis” kūpā ar “Bērnistabas” dizaina autori Kristiānu Dimiteri.

berkenelesplakats

Print Friendly, PDF & Email

Nūtikšonu kalendars