Eiropys izcyluokūs turisma golamierku aba EDEN (European Destinations of Excellence) projektu konkursa “Tūrisms un vietējā gastronomija” nacionalajā saceņseibā par uzvarātuoju pasludynuota bīdreiba “Latgales kulinārā mantojuma centrs”.

Ar Kruoslovys turisma informacejis centra iniciativu bīdreiba  ir nūdybynuota 2013. goda 6. decembrī i itūšaļt apvīnoj 32 Latgolys regiona ādynuošonys sektora uzjāmumus, gostu sātys, atpyutys bazis, sātys ražuotuojus, kas dorbojās, popularizejūt Latgolys kulinarū montuojumu.

Bolvā konkursa uzvarātuojim nūdrūsynoj mārketinga i publicitatis aktivitatis Latvejā i uorvaļstīs. Itūšaļt “Vides filmu studijā” nūteik dorbs pi videokinys par konkursa veiksmeiguokajim dalinīkim. Konkursa uzvarātuoja – bīdreiba “Latgales kulinārā mantojuma centrs” – byus tīseiga izmontuot Eiropys Komisejis izstruoduotū EDEN logotipu, pīsadaleit EDEN īprīškejūs godu uzvarātuoju sadarbeibys teikla aktivitatēs Latvejā i cytur Eiropā i apmeklēt Eiropys Komisejis reikuotūs pasuokumus EDEN sadarbeibys teikla dalinīkim.

Latgolys regions jau 11 godu dorbojās Eiropys kulinaruo montuojuma teiklā, izmontojūt vīnuotu kulinaruo montuojuma logotipu. Golvonī ituo teikla mierki ir uzjiemiejdarbeibys veicynuošona, patārātuoju vajadzeibu apmīrynuošona caur regionaluos identitatis styprynuošonu, veicynojūt regionalūs iedīņu atpazeistameibu, bolstūtīs iz vītejūs i regionalūs resursu izmontuošonu.