2015. godā Ludzys Nūvodpietnīceibys muzeja darbinīki realizēja Vaļsts Kulturkapitala fonda atbaļsteitū projektu “Viss sākās Ļucinas štetelē”.

Parkū taids nūsaukums? Itū frazi nazkod ir sacejs nūvodnīks Hercs Franks, gastejūt Ludzys muzejā. “Štetele” jidišā nūzeimoj moza piļsieteņa– deminutivs nu vuocu vuorda “stadt”.

2016. godā H. Frankam byutu 90 godu. Par gūdu itai nūtikšonai Ludzys Nūvodpietnīceibys muzejam roduos ideja izveiduot ceļojūšū izstuodi par Franku saimi i jūs davumu na tik Ludzai, nu ari vysam pasauļam. Herca Franka tāvs Vulfs Franks beja vīns nu pyrmajim Ludzys (Ļucinys) fotografim i, pasasokūt jam, mes zynam, kai piļsāta izavēre 20. gs. suokuos. Sovukuort Hercs Franks ir vīns nu legendaruokajim i pasaulī slovanuokajim Latvejis kinodokumentalistim. 20. godu symta 60. godu suokuos jis beja pyrmūs calmlaužu vydā, kas suoce veiduot tai sauktū Reigys poetiskū dokumentaluos kinys školu. Herca Franka filmografejā ir vaira par 80 īrokstu, lela daļa juo kinu īkļautys Latvejis kinoviesturis zalta fondā, i vairuokom kinom ir byutyska nūzeime ari pasauļa kinys kontekstā.

Ideju par izstuodis izveidi atbaļsteja VKKF, daškirūt 1500 eiro. Par sajimtū finansiejumu tyka izgataveiti 11 puorceļami baneri, kurūs ir cīši vīglai transportēt i montēt, kai ari vitrina. Projekta leidzfinansātuojs ir Ludzys nūvoda pošvaļdeiba.

Izstuodis “Viss sākās Ļucinas štetelē” atkluošona Ludzys Nūvodpietnīceibys muzejā nūtiks 21. janvarī.

Karteņa: ludzasmuzejs.lv