Daugovpilī nūtiks pasuokumi Stanislava Broka pīmiņai
Nu 12. da 29. janvara Daugovpilī nūtiks pasuokumi, kas veļteiti dirigenta, pedagoga i komponista Stanislava Broka pīmiņai.
12. janvarī 15.00 Stanislava Broka Daugovpiļs Muzykys vydsškolā i 13. janvarī 16.00 Daugovpiļs Vīneibys nomā nūtiks I Storptautyskais Stanislava Broka Jaunūs kordirigentu konkurss, kurymā pīsadaleis vydsškolu jaunī kordirigenti nu Latvejis, Boltkrīvejis, Ukrainys i Krīvejis.
14. janvarī 12.00 Stanislava Broka Daugovpiļs Muzykys vydsškolā nūtiks VIII Stanislava Broka Jaunūs dzīduotuoju konkurss, kurymā dzīduos Latvejis muzykys školu jaunī dzīduotuoji, nu tīpat 22. janvarī 18.00 varēs baudeit Stanislava Broka Daugovpiļs Muzykys vydsškolys audziekņu i pedagogu koncertu.
Pasuokumu cykls tiks nūslāgts 29. janvarī 18.00 ar Stanislava Broka pīmiņai veļteitu koncertu Stanislava Broka Daugovpiļs Muzykys vydsškolā.
Itūgod Stanislavs Broks svieteitu 90 godu jubileju – jis dzims 1926. godā Rēzeknis apriņča Drycānu pogostā. Piec vuiceibu Drycānu pamatškolā, Rēzeknis 1. vydsškolā, Rēzeknis Muzykys vydsškolā i Latvejis Vaļsts konservatorejā suocs struoduot Daugovpiļs Muzykys vydsškolā par direktoru i kora dirigiešonys pedagogu. Daugovpilī jis puorkuortuojs Muzykys vydsškolys dorbu, nūdybynuojs jauktū kori “Daugava”, bejs vīns nu Latgolys dzīšmu svātku iniciatorim i organizatorim, Vyspuorejūs latvīšu Dzīšmu svātku viersdirigents. 1977. godā Stanislavs Broks tragiski guoja būjā autoavarejā.
