Rēzeknē apsaverama Vincenta Flikigera izstuode “Latgale laika ritā”

Rēzeknē apsaverama Vincenta Flikigera izstuode “Latgale laika ritā”

flikigersDa 6. februara Latgolys Kulturviesturis muzejā (Atbreivuošonys alejā 102, Rēzeknē) apsaverama Šveicis muzika i muokslinīka Vincenta Flikigera zeimiejumu izstuode “Latgale laika ritā”. Da šam Vincents Rēzeknē zynoms kai muzikis Baroka muzykys dīnuos, nu itūreiz pīduovoj sovu Latgolys redzīni caur zeimiejumim.

Sasatikšona ar autoru Latgolys Kulturviesturis muzejā nūtiks 22. janvārī 15.00, kod varēs izbaudeit i Vincenta Flikigera stuostejumu par izstuodi, i muziciešonu kūpā ar Ilzi Gruduli.

Kai viestej pošvaļdeibys agenturys  “Rēzeknes Kultūras un Tūrisma centrs” puorstuove Maija Upeniece, izstuodē apsaverami 23 malnbolti zeimiejumi ar komentarim latviski i latgaliski, kurymūs atsakluoj muokslinīka redzīņs par diveju nedeļu laikā īvāruotom kasdīnys niansem Latgolā. Zeimiejumūs attāluoti Latgolys lauku prīškmati i kuormi, ar apbreinu nūviertejūt naparostū kasdīniškajā i Latvejis laukūs kluotynasūšū tradicionaluos kulturys montuojumu.

Autora seņ dūmuotuo ideja par izstuodi eistynuojusēs paguojušajā vosorā, i 2015. godā tei jau eksponāta Raiņa sātā Berkenelē, Leivuonā i Preiļūs.

Muzikis i muokslinīks Vincents Flikigers (Flückiger) dzims 1975. godā Frīburgā, Šveicē. Nu jau vaira par desmit godu regulari apmeklej Latveju, eipaši Latgolu. Vaira publikys Vincentu Flikigeru īpazyna Baroka muzykys dīnuos Rēzeknē i vys vēļ kotru godu izbauda juo muzykalū snāgumu. Vincenta sīva ir latvīte Ilze Grudule, jis takūšai runoj latviski. Paraleli profesionalai koncertdarbeibai jis regulari pīsadola vyspasauļa zeimietuoju apvīneibys “Urban Sketchers” aktivitatēs, i 2015. godā Ņujorkā izdūta Vincenta pyrmuo zeimiejumu gruomota “Inside Salmeck”.

Byudams Latvejā, Vincents Flikigers ar Ilzi Gruduli snēgs vairuokus kamermuzykys koncertus, tamā storpā, 22. janvarī muzicēs Latgolys Kulturviesturis muzejā. 23. janvarī Rēzeknis nūvoda Lūznovys muižā koncertā skanēs baroka laika muzyka nu Italejis, Francejis i Vuocejis, sovukuort 24. janvarī muokslinīki koncertēs Stiernīnis bazneicā, kur svineigā dīvkolpuojumā jubilara dirigenta Juoņa Gruduļa vadeibā skanēs Šarla Guno “Messe Breve No.5 Aux Séminaires” veiru koram i varganem.

Attāls: Vincenta Flikera zeimiejums 

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]