Rēzeknis nūvoda pošvaļdeibys foaje da 5. februara apsaverama fotografa Leonida Važnuo fotoizstuode “Latgales piktoreālisms”.

Kai informej pats autors, izstuodē apsaverami juo retrospektivī dorbi, kas ir veiduoti piktorealuos fotografejis žanrā, kas teik raksturuots ar gleznīcyskumu, romantismu, sižeta stuosta napabeigteibu. Tys ir vīns nu klasiskuos fotografejis paveidim.

Projekta pamatā ir vizualitatis pietnīceiba, izmontojūt eipašus – “meikstūs” – objektivus, kas veidoj naosu attālu, kura rezultatā ari veidojās piktorealais attāls, kuram pīmeit gleznīcyskuma eipašeibys.

Itūreiz projekta pamatā ir dorbi, kas veiduoti izmontojūt vēļ analogū fotografejis tehnologeju (2000. g.–2004. g.). Attālu vizualī tāli ir veiduoti tik ar gaismys i optikys leidzdaleibu, grafiskais redaktors ir izmontuots tik kruosys i gaišuma korekcejuos, kai ari seiku vizualūs defektu nūviersšonai.

Ar piktorealū fotografeju autors ir suocs nūsadorbuot i tū pietejs, rokstūt bakalaura dorbu Eiropys Humanitarajā Universitatē Viļņā (“Piktoreāla fotogrāfija ka asociatīvas fotogrāfijas pamats” (2008. g.–2012. g.)).

Kai soka pats muokslinīks, itys muokslys fotografejis veids ir napamatuotai damiersts. Itei izstuode ir uzadreikstiešona paruodeit vīnu nu aizeimūšim klasiskuos muokslys fotografejis paveidim.

Izstuodis autors Leonids Važnais ir fotografs, fotografejis pasnīdziejs, “LeonFoto” fotoškolys Austrumlatvejā dybynuotuojs i vadeituojs (Rēzeknē). Meiluokais vierzīņs fotografejā – piktorealisms i asociativuo fotografeja, autora lobuokī dorbi ir veiduoti taišni itymā žanrā. Autora sātyslopa: leonfoto.blogspot.com