NEPLP eistynoj Latgolys elektroniskūs medeju programu

NEPLP eistynoj Latgolys elektroniskūs medeju programu

Izsludynojūt četrus konkursus par radejis i TV programu veiduošonu Latgolā, Nacionaluo elektroniskūs plošsazinis leidzekļu padūme (NEPLP) ir suokuse īvīst Latgolys elektroniskūs medeju programu, kuruos mierkis ir styprynuot Latgolys informativū sasaisti ar puorejim Latvejis apgobolim i garantēt, ka Latvejis pīrūbeža dzeivuotuoji teik informāti par vaļstī nūteikūšajim procesim i storptautyskūs nūtikšonu atteisteibu, informej NEPLP informacejis centrys.

Kai nūruoda NEPL Padūmis lūceklis Dainis Mjartāns, Latgolys medeju programa ir pasuokumu i aktivitašu kūpums, kas bolstuos iz sabīdryskū pasyutejumu sabīdryskajim i komercmedejim, kai ari ītver tehniskūs rysynuojumus apraidis izlobuošonai. Eipaša viereiba itamā programā tiks pīvārsta satura ražuošonys atbolstam vītejuos radejuos, kas Latgolā vys vēļ ir nūzeimeigs informacejis olūts i sasnādz īvārojamu auditoreju.

Satura ražuošonai regionalūs i vītejūs radeju i TV programu veiduošonai konkursu kuorteibā NEPLP itūgod kūpumā nūvierzeis 142 000 eiro. Leluokuo daļa nu ituos summys dūmuota Latgolys komercialūs radeju kapacitatis styprynuošonai, ziņu, diskuseju i analitiskūs raidejumu veiduošonai latvīšu, latgalīšu i krīvu volūdā. NEPLP Latgolys elektroniskūs medeju programa paradz ari vītejūs i regionalūs TV atbolstu, tok itam mierkim finansiejums pylnā apjūmā natyka pīškierts.

2016. godam ir nūdrūsynuots finansiejums kasnedelis raidejumam latgaliski Latvejis Radejis (LR) pyrmajā programā, kai ari NEPLP veicynuojuse LTV7 ziņu krīvu volūdā translaceju Daugovpiļs vītejā kabeļtelevizejā Dautkom TV.

Ūtrais nūzeimeigais pasuokums Latgolys elektroniskūs medeju programys ītvorūs ir LR multimedeju studejis izveiduošona Latgolā. Itam mierkim Saeimys Budžeta i finaņšu (nūdūkļu) komiseja dasarunuoja puordaleit budžeta finansiejumu nu Latvejis TV, 2016. godā paradzūt itam mierkim 155 000 eiro. Studejis aizdavums byus nūdrūsynuot regionaluos informacejis plyusmu vysom LR programom, veiduot i puorraideit regionalū saturu LR4 programā, veiduot saturu portalam LSM.lv, kai ari atteisteit kūpprojektus ar LTV.

Jemūt vārā, ka Latgolā cīši izjiutama diveju atškireigu informativūs telpu asameiba, kū pastyprynoj breivai uztveramuos sābru vaļstu televizeju programys, i dzeivuotuoji ir pakļauti atškireigai informacejai i interpretacejai par nacionalajim, storptautyskajim, ekonomiskajim, socialajim i kulturys procesim, LR studeja kolpuos tam, kab pīrūbežā dzeivojūšī Latvejis dzeivuotuoji pastyprynuoti teik informāti par vaļstī nūteikūšajim procesim i storptautyskūs nūtikšonu atteisteibu. Studeja ir prīšknūsacejums tam, kab palelynuotu sabīdryskūs medeju auditoreju Latgolā, kai ari, kab styprynuotu latgalīšu ideņtitati i volūdu.

NEPLP ir lyuguse LR vaļdi itūmienes atkluot Latgolys studejis koncepceju, paradzūt ari vareibu izveiduot mobilu studeju, kab varātu satura ražuošonai aptvert vysu Latgolys teritoreju, ari apdzeivuotuos vītys pīrūbežā.

LR studeja, kur saturu veiduos finansiali i tehnologiski nūdrūsynuoti žurnalisti, padūmis redzīnī byus īguļdejums naatkareigys žurnalistikys atteisteibai Latgolā.

Jemūt vārā, ka NEPLP Latgolys elektroniskūs medeju programa paradz veicynuot žurnalistikys vuiceibys i medeju specialistu sagataveišonu Latgolys regionalajuos augstškoluos, NEPLP atzineigai nūviertej Rēzeknis Tehnologeju akademejis lāmumu nu nuokušuo vuiceibu goda pīduovuot akademiskū magistra studeju programu “Reģionālie mediji un komunikācija”.

Latgolys elektroniskūs medeju programa teik eistynuota, sasadorbojūt NEPLP, Kulturys ministrejai, Latvejis Vaļsts radejis i televizejis centram, VAS “Elektroniskie sakari” i cytom vaļsts institucejom.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]