Ar muzykalu monologu Latvejis piļsātuos gasteis Kristaps Rasims

Ar muzykalu monologu Latvejis piļsātuos gasteis Kristaps Rasims

Latgalīšu akters i TV šova “Izklausies redzēts!” uzvarātuojs Kristaps Rasims jau 5. martā suoks ceļuojumu pa Latvejis piļsātom, kab skateituojus īpazeistynuotu ar sovu jaunū muzykalū monologu “Personības dalīšanās”. Juo pyrmuo uzastuošona paradzāta Vīseitis kulturys pilī, informej pasuokuma organizatori.

“Tys byus sovpateigs “stand up”, kurymā skanēs ari poša radeitys miniaturys. Vaira nikuo naatkluošu, partū ka grybu, kab publika padūmoj i poši saprūt, kas tys ir,” par jaunū projektu, kura režisors ir Valdis Pavlovskis, soka Kristaps, sovukuort Valdis ar smaidu dasoka, ka zynomā mārā jaunuo izruode “nadaudz byus provokaceja”.

Runojūt par sovu “rodūšū viesturi”, akters stuosta, ka bīži sevi redz, skrīnūt eisuos jiuzuos pa pļovu pi dzeda Latgolā. “Sasarunuoju pats ar sevi, ar kačim, ar gitaru (ari latgaliski, krīvyski i angliski). Nazcik reižu asu apceriejs dūmu par īšonu nuovē sīvīšu deļ: Džuļjetys deļ – divpadsmit reižu, Britnijis Spīrsys deļ (bierneibā!) – vīnu reizi, Alisis deļ – vīnu reizi (tod puordūmuoju) , Zentys deļ (nu dušmu) – vīnu reizi, šmakovkys deļ – vīnu reizi (nav sīvīte!),” smejās Kristaps.

Par sevi jis vēļ soka, ka atsasauc iz vuordu Jezups, dzīžūt publiskuos vītuos, i peļnej maizi ar muti, bīži identificejūtīs ar īdūmu tālim, tamā vydā popularim latvīšu i uorzemu muokslinīkim i dzeivē satyktim tipažim.

“Komunicejūt ar i par meilim cylvākim, bārnim i siermgolvim, varu palikt beistamai sentimentals,” – ari tū par sevi soka Kristaps Rasims i stuosta, ka vēļ naasūt eisti saprats, voi akters, muzikis, pasuokumu vadeituojs, veirs, tāvs, latvīts i latgalīts “ir diagnoze, profeseja, puorlīceiba voi vīnkuoršai – cylvāka syuteiba”.

Nu skotuvis da ekrana, car dzeivis atziņom, dzīsmem, nūspālātom i vēļ nanūspālātom lūmom – tys vyss byus atrūnams Kristapa Rasima jaunajā muzykalajā monologā “Personības dalīšanās”.

Kristapa Rasima izruodis nūtiks:

5. martā 18.00 Vīseitis kulturys pilī
8. martā 19.00 Ikškilis tautys nomā
11. martā 19.00 Rībeņu kulturys centrā
17. martā 19.00 Guļbinis kulturys centrā
18. martā 19.00 Reigā, kulturys pilī “Ziemeļblāzma”
28. martā 15.00 Bolvu kulturys i atpyutys centrā
1. aprelī 19.00 Leivuona nūvoda kulturys centrā
2. aprelī 19.00 Modyunis kulturys nomā
8. aprelī 19.00 Ādažu kulturys centrā
9. aprelī 19.00 CATA kulturys nomā Ciesīs

Kristaps Rasims

Foto: publicitatis kartenis

Print Friendly, PDF & Email

Nūtikšonu kalendars

May
17
Ūtr
15:00 Maja dzīduojumi pi krysta @ Ūzulainis krysts
Maja dzīduojumi pi krysta @ Ūzulainis krysts
May 17 @ 15:00 – 16:00
Maja dzīduojumi Dīvmuotis gūdam kūpā ar Ūzulainis Tautys noma folklorys kūpu “Zeiļa”.
16:00 Maja dzīduojumi pi krysta @ Pleikšņu krysts
Maja dzīduojumi pi krysta @ Pleikšņu krysts
May 17 @ 16:00 – 17:00
Maja dzīduojumi Dīvmuotis gūdam kūpā ar Ūzulainis Tautys noma folklorys kūpu “Zeiļa”.
May
18
Tre
15:00 Lienītis Slišānis izstuodis “Uzd... @ Latvejis Nacionaluo teatra Jaunuo zale
Lienītis Slišānis izstuodis “Uzd... @ Latvejis Nacionaluo teatra Jaunuo zale
May 18 @ 15:00 – 16:30
Nu 10. maja Latvejis Nacionaluo teatra Jaunajā zalē apsaverama Lienītis Slišānis izstuode “Uzdevums”. Izstuodi īspiejams apmeklēt stuņdi pyrma izruožu suokuma i izruožu laikā. Lienīte Slišāne ir gaismu muokslineica i 2020. goda beiguos sajēme “Spēlmaņu nakts”[...]