Leivuonā nūtiks lobūs dūmu koncerts “Es topu samīļots mazliet”

Leivuonā nūtiks lobūs dūmu koncerts “Es topu samīļots mazliet”

Leivuona Sv. Erceņgeļa Mikeļa Rūmys katuoļu bazneica svātdiņ, 7. februarī, 12.30 aicynoj iz lobdareibys koncertu leidzcylvāku atbolstam “Es topu samīļots mazliet”. Draudzis lūcekli cyts cytu zyna, tok sasateik tik iz eisu šaļti dīvkolpuojumūs. Nu vys bazneica daudzim ir vīta, kur rast patvārumu, partū ka Dīvs muok sameiļuot kotru dvēseli.

Koncertā “Es topu samīļots mazliet” pīsadaleis Latvejā zynomi muziki – Jurs Kulakovs i Dainis Skutelis, kai ari divejis aktivys i muzykalys saimis: Gruozu saime nu Leivuona nūvoda Rudzātu i Urtānu saime nu Jākubpiļs. Naīrostā amplua – kai vokalists – klauseituojus prīcynuos dīvnoma saiminīks – Leivuona draudzis prāvests Jurs Zarāns. Muzicēs ari Leivuona katuoļu draudzis kors “con Amore”, kai vīnu nu prīšknasumim kūpā ar autoru izpyldūt Jura Kulakova komponātū skaņdorbu “Jubilate Deo”.

Koncerta iniciatore, draudzis kora “con Amore” vadeituoja Rita Semeiko soka, ka goreiguos muzykys koncerti Leivuona katuoļu bazneicā nimoz nav ratums – sakraluo vide ir pateiceiga, kab uzrunuotu cylvāku sirdi i car lyugšonys vuordu, i car meļdeņu. Itys byus eipašs koncerts, partū ka tuo laikā draudze vuoks leidzekļus treis Leivuona nūvoda dzeivuotuoju atbolstam.

Leidzekli vajadzeigi, kab leidzcylvāki varātu uzlobuot sovu veseleibys stuovūkli. Par pīmāru, 24 godus vacuo Marta Vuškārniece ir aktiva draudzis lūcekle, kas, nasaverūt iz puorsavītuošonu rateņkrāslā, regulari apmeklej bazneicu i pīsadola dīvkolpuojumūs. Divpadsmitgadeigais Daniels Žuks ir puiškins, kurs nu bierneibys cīš nu cerebraluos trīkys i kura rehabilitacejai regulari vajadzeigi leidzekli. Sovukuort 1970. godā dzymušajam Juoņam Miltam ir vajadzeiga rehabilitaceja piec mugurkaula traumys.

Koncerta organizatori aicynoj sevkuru baudeit muziku snāgumu koncertā “Es topu samīļots mazliet” 7. februarī 12.30 Leivuona Rūmys katuoļu bazneicā i kūpeigai paveikt lobu dorbu leidzcylvākim.

Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]