Raiņa sātā Berkenelē da 20. marta apsaverama fotoizstuode “Latvijas mazās gaismas pilis”.

Latvejis Nacionaluos bibliotekys Atbolsta bīdreibys i arhitekta Juoņa Dripis veiduotajā fotoizstuodē var īsapazeit ar 59 Latvejis bibliotekom, kas pādejūs desmit godūs pīdzeivuojušys pozitivys puormainis. Latgolu izstuodē puorstuov Latgolys Centraluo biblioteka, Maduma pogosta biblioteka, Bikernīku pogosta biblioteka, Laucesys pogosta biblioteka, Smeļteru biblioteka, Dagdys nūvoda tautys biblioteka, Preiļu Golvonuo biblioteka, Leivuona nūvoda Centraluo biblioteka, Turku pogosta biblioteka, Sutru biblioteka, Seiļukolna biblioteka, Bolvu Centraluo biblioteka, Viļakys nūvoda biblioteka i Ūzulmuižys pogosta biblioteka.

Arhitekts i izstuodis kurators Juoņs Dripe: “Itys ir gaismys punktu vizualizacejis projekts i stuosts par pozitivim procesim Latvejis bibliotekuos nu Leivuona da Valmīrys, nu Kurseišu da Maduma voi Jumurdys, Mārupis i Zorgu. Koč i mārūgi i rūceiba bīži ir nasaleidzynami, mes raudzejom pamaneit na viņ izcileibu, nu ari lobū grybu vysūs Latvejis nūvodūs. Myusdīneiga biblioteka seņ vairs nav tik gruomotu globuotuve. Lobajūs pīmārūs tei ir vītys dvēsele. Tī kūpā breineigi sadzeivoj kulturys montuojums i myusu dīnu tehnologejis, gruomota i virtualais teksts, mozpiļsātu mīrs i pasauļa dvaša, arhitektura i saturs.”

Izstuode “Latvijas mazās gaismas pilis” pyrmūreiz tyka eksponāta Latvejis Nacionaluos bibliotekys jaunajā ākā tuos atkluošonys nedeļā. “Latvijas mazās gaismas pilis” da šam jau skatejuši Ventspiļs, Valmīrys, Daugovpiļs, Jelgovys, Limbažu, Tukuma, Saldus, Kuldeigys, Viļakys, Modyunis, Leivuona, Preiļu, Līpuojis, Salaspiļs, Streņču, Siguldys i Ādažu dzeivuotuoji.

“Latvijas mazo gaismas piļu” izstuodis idejis autori ir Latvejis Nacionaluos bibliotekys direktors Andris Vilks i Limbažu Golvonuos bibliotekys direktore Dzintra Justa. Fotoizstuodi reikoj Latvejis Nacionaluos bibliotekys Atbolsta bīdreiba ar Latvejis Kulturkapitala fonda, ABLV Charitable Foundation, Live Riga, Daugovpiļs piļsātys dūmis, Daugovpiļs nūvoda dūmis i cytu Latvejis pošvaļdeibu atbolstu.