Apsaverama izstuode “Preiļi gleznās”

Apsaverama izstuode “Preiļi gleznās”

Da 12. februara Preiļu kulturys noma konfereņču zalā apsaverama Preiļu viesturis i lītiškuos muokslys muzeja izstuode “Preiļi gleznās”.

Kolekceju “Preiļi gleznās” veidoj dažaidu autoru apmāram symts muokslys dorbi, kurymūs īmyužynuots Preiļu muižys apbyuvis komplekss ar romantiskū parku, pili, kapelu, klāvim, sorga sātu i parka vuortim, piļsātys īlys, sātys, tyvuokys i tuoluokys apleicīnis ainovys. Itī muokslys dorbi puorsvorā muzejā tykuši kai muokslinīku duovynuojumi, muzeja organizātūs pleneru rezultatā.

Pleneru tradiceja Preiļūs aizasuokuse jau tuolā paguotnē. Preiļu viesturis i lītiškuos muokslys muzeja kruojumā atsarūn dorbi, kas datejami ar 1980. godu,­­ – nu plenera, kurymā pīsadalejuši Reigys Tautys tāluotuojmuokslys studeju dalinīki. 1995. godā Preiļūs nūtyka Rēzeknis Muokslys koledžys audziekņu pleners, nu 2002. godā –  jaunūs muokslinīku vosorys praksi turpynuoja Latvejis Muokslys akademejis Latgolys filialis studenti. Profesionalūs muokslinīku plenerus muzejs suoce organizēt 1998. goda vosorā. Nu 2005. goda par tradiceju palykuši rudiņa pleneri Preiļūs i nu 2010. goda – ari Rībeņūs – šaļtī, kod doba pīrymuse piec plaukšonys, augšonys i augļu brīsšonys, nu kruosys sajāmušys pylnbrīdu. Rudiņa plenerūs pīsadola profesionali muokslinīki nu Latgolys, Reigys, nu 2007. goda – ari gosti nu cytu vaļstu. 2015. godā Preiļūs nūtyka pyrmais Jezupa Pīguožņa vuordā nūsauktais muokslinīku pleners, veļteits dyžonajam nūvodnīkam, ainovu gleznuotuojam.

Organizejūt plenerus, teik veicynuota nūvoda muokslinīku rodūšuo darbeiba, jaunūs muokslinīku izaugsme, kai ari Preiļu nūvoda i piļsātys atpazeistameiba. Itūs profesionalūs muokslys pleneru rezultatā Preiļu viesturis i lītiškuos muokslys muzeja kruojums regulari teik papyldynuots ar augstvierteigim muokslys dorbim. Godu gaitā leluoks palics i dalinīku sastuovs, i teritorialī rūbeži gleznīciskūs ainovu vaicuojumūs. Muokslinīki soka, ka plenerus juoreikoj jaukuos saskarsmis deļ, kū vīnā vasalumā sakausej muokslinīks, cylvāki i vide.

Izstuodē eksponāti vairuoku autoru dorbi nu muzeja kruojuma muokslys kolekcejis.

20160127_afisa_muzejs_labota