Nu 5. da 7. februara Daugovpilī, Kulturys pilī (Smiļšu īlā 92), nūtiks Storptautyskais tautys deju sadaņcs, kurymā pīsadaleis deveni vysaidu tauteibu deju kolektivi nu Latvejis i uorvaļstu.

Daugovpiļs piļsātys dūmis Kulturys puorvaļde, suocūt jaunu tradiceju, reikoj Storptautyskū tautys deju sadaņci, kuruo mierkis ir popularizēt tradicionalū latvīšu i cyttautu deju, atteisteit, pylnveiduot i kūpt deju kolektivu tradicejis, nūdrūsynuot deju kolektivu darbeibys napuortraukteibu, kai ari veicynuot mozuokumtauteibu kolektivu īsakļaušonu kūpejā tautys tradiceju izkūpšonā, nūstyprynuošonā i nūdūšonā tuoluokom paaudzem.

Sadaņča laikā nūtiks vairuoki koncerti, kurymūs kūpā ar Latvejis kolektivim pīsadaleis uorvaļstu kolektivi nu Daugovpiļs sadraudzeibys piļsātu – Vitebskys (Boltkrīveja) i Panevežys (Lītova). Atkluošonys koncerts nūtiks 5. februarī 18.00, lelkoncerts – 6. februarī 18.00. Īīšona koncertūs – bez moksys.

Sastdiņ, 6. februarī, sadaņča dalinīkim byus vareiba pīsadaleit ari vysaidu tautu deju meistarklasēs. Pyrmajā Storptautyskajā tautys deju sadaņcī Daugovpilī tuos byus latvīšu, boltkrīvu i krīvu dejis meistarklasis. Meistarklašu mierkis ir izkūpt vysaidu tautu dejis tradicejis, tehniku i metodiku, kai ari rūsynuot izpratni par tom. Boltkrīvu dejis meistarklasi vadeis Boltkrīvejis nūpalnim boguotuo deju ansambļa “Ļavoņiha” muokslinīcyskais vadeituojs Dmitrijs Timoščenko, krīvu dejis meistarklasi vadeis Krīvejis nūpalnim boguotuo deju ansambļa “Rosijanočka” dybynuotuojs i vadeituojs, Sanktpīterburgys Orūdbīdreibu Humanitaruos universitatis pasnīdziejs, horeografs Aleksandrs Nosihins, sovukuort latvīšu dejis meistarklasi vadeis Latgolys deju meistars Ilmārs Dreļs.

Storptautyskū tautys deju sadaņci reikoj i atbolsta Daugovpiļs piļsātys dūme, Daugovpiļs piļsātys dūmis Kulturys puorvaļde, Daugovpiļs Kulturys piļs, Vaļsts Kulturkapitala fonds, Latvejis Nacionalais kulturys centrys.