Īsnāgums latgalīšu volūdā – voi pošvaļdeiba var atsasaceit tū izavērt? “Kolnasātā” teik skaidruots, parkū Leivuona nūvoda dūme lyudz sajimtū īsnāgumu tulkuot latvīšu volūdā i teik lyugts Vaļsts volūdys centra komentars. Raidejums sasazynoj ar Leivuona nūvoda dūmis izpylddirektoru Uldi Skreiveru, Saeimys deputatu Juri Viļumu, kai ari Vaļsts volūdys centra direktora vītnīku Agri Timušku.

Konfliktu nu volūdys skotpunkta Vuordineicā apsaver Arņs Slobožanins i Valentins Lukaševičs – runoj par streidim i vuordu “sirdeitīs”.

Sovukuort Teņs Bikovskis aizbraucs iz Latvejis – Boltkrīvejis rūbežu, kur kūpā ar Indrys pogosta dzeivuotuojim runoj na par informacejis telpu i bīdynuojumim vaļsts drūšeibai, nu skaidroj, kaidys ir vareibys, kū cylvākim dūd dzeive pīrūbežā. Voi tī bīži laižās iz ūtru pusi, kab liešuok īsaguoduotu kaidys precis voi tyktu pi cytu lobumu? Kaids nūpierk cukru, partū ka pi myusu tys naasūt “eists”, cyti iz Boltkrīvejis pusi brauc tik partū, kab apmaklātu radinīku kopus.

Raidejumu klausīs ite.