Par gūdu izcylajam latvīšu keramikys vacmeistaram Pīteram Martinsonam (1931-2013) Daugovpiļs Marka Rotko centrys izsludynoj Latvejis Storptautyskū keramikys biennali, kas nu 15. da 22. juļa. Tuos ītvorūs Daugovpilī, kai ari cytuos Latvejis piļsātuos tiks atkluotys vairuokys laikmeteiguos keramikys izstuodis, reikuota konfereņce i cyti pasuokumi.

Biennalis nūzeimeiguokais pasuokums, kurymā aicynuoti pīsadaleit Latvejis i uorvaļstu keramikys muokslinīki, byus izstuode – konkurss “Martinsona balva”. Storptautyska nūzaris specialistu žūreja atlaseis daleibai izstuodē lobuokūs keramikys muokslinīkus, nu kurūs vyda tiks nūsaukti seši “Martinsona balvas” laureati nacionalajā i storptautyskajā kategorejā.

“Martinsona balvas” padūšona i Latvejis Storptautyskuo keramikys biennale atteisteis laikmeteiguos keramikys nūzari i veicynuos tuos atdzimšonu Latvejā i Baļtejā, kai ari atguodynuos storptautyskajai i vītejai sabīdreibai par keramika Pītera Martinsona davumu muokslys keramikys jūmā Latvejā i pasaulī.

2013. godā P. Martinsons duovuoja Rotko centram lelu sovu dorbu izlasi, kas ir Latvejā leluokuo muokslinīka dorbu kolekceja.

Keramiki nu vysa pasauļa teik aicynuoti da 1. apreļa dasasaceit Latvejis Storptautyskuos keramikys biennalis konkursa izstuodei “Martinsona balva”. Tei tiks atkluota 15. julī Daugovpiļs Marka Rotko muokslys centrā.