Rēzeknē atbaļsteiti 9 mozī kulturys i turisma projekti

Rēzeknē atbaļsteiti 9 mozī kulturys i turisma projekti

Nūsasliedzs pošvaļdeibys agenturys “Rēzeknes Kultūras un Tūrisma centrs” organizātais kasgadejais Mozūs kulturys i turisma projektu konkurss. Agenturys puorstuove Maija Upeniece informej, ka atbaļsteiti deveni projekti i kūpā pīškierts finansiejums 7200 eiro apmārā.

Itūgod projektu konkursā beja īsnīgti 16 projekti. Jemūt vārā projektu izstruodis kvalitati i atbiļsteibu nūlykumam, ilgtspiejis pamatuojumu i ituogods izvierzeituos prioritatis atspīgeļuojumu – aktivys atpyutys vareibu palelynuošona Rēzeknis piļsātā -, Kulturys komiseja nūlēme atbaļsteit deveņus projektus.

Atbaļsteitī projekti:

  1. Latgolys Kulturys centra izdevnīceibys projekts “Literatūras almanahs “Olūts” 21. laidiens” – pīškierti 400 eiro.

Literaturys almanahs nūdrūsynoj latgalīšu raksteituos literaturys puormontuojameibu i atspīgeļoj tuos leimeni itūšaļt, īpazeistynojūt školu jaunatni i skaiteituojus ar kulturys procesim Latgolā. 

  1. Bīdreibys “ARAYAN” projekts “30. gadu ebreju kino” – pīškierti 450 eiro.

Projekta ītvorūs tiks turpynuota tradicionaluos ebreju kulturys izpiete i klezmer muzykys vuiceišonuos, nūslāgumā demonstrejūt malnboltū māmū kinu dzeivuos muzykys pavadejumā. 

  1. Bīdreibys “Tālu skan” projekts “Latvijas elektroniskās mūzikas mūziķu skates “Bīts manai paaudzei”” – pīškierti 420 eiro.

Projektā paradzātuos muziku skatis planavuots reikuot piļsātys svātku ītvorūs, aicynojūt jaunūs muzikus īsasaisteit bez moksys i atkluojūt elektroniskuos muzykys daudzpuseibu. 

  1. Bīdreibys “EXCELSUS” projekts “XIII Starptautiskais akordeonistu plenērs “Gabrova – Rēzekne 2016”” – pīškierti 1070 eiro.

Pleners veicynoj akordeonistu profesionalū pylnveiduošonūs i styprynoj storptautyskū sadarbeibu (Latveja, Zvīdreja, Sūmeja, Krīveja), nūslāgumā pīduovojūt plenera dalinīku koncertu.

  1. Bīdreibys “Jaunatnes čemodāns” projekts “Popieliņa “Pa pasakas takām”” – pīškierti 450 eiro.

Projekta ītvorūs tiks reikuots pasuokums 5.-8. klašu školānim, veicynojūt bārnu aktivu leidzdaleibu i dūmūt vareibu realizēt rodūšuos idejis i izpaust sovus talantus. 

  1. Bīdreibys “STOPTIME DANCE STUDIO” projekts “Vektors kustībai” – pīškierti 400 eiro.

Projekts paradz nūorganizēt 4 bezmoksys aktivys atpyutys pasuokumus vysaida vacuma Rēzeknis dzeivuotuojim i car deju, sporta nūdarbeibom i orientiešonuos spēlem veicynuot i popularizēt veseleigu dzeivisveidu. 

  1. Bīdreibys “Latgalieši” projekts “Mākslinieka Osvalda Zvejsalnieka izstādes “Rēzekne” katalogs” – pīškierti 1761 eiro.

Paradzātais katalogs paruodeis i apkūpuos muokslinīka O. Zvejsalnieka rodūšū davumu gleznīceibā, sekmejūt Rēzeknis atpazeistameibu storptautyskā mārūgā car muokslys i kulturys procesim. 

  1. Rēzeknis Muokslys i dizaina vydsškolys projekts “Restaurēsim pilsētas senās vērtības!” – pīškierti 1761 eiro.

Projekta mierkis ir veicynuot Rēzeknis Muokslys noma restauracejis procesus, paradzūt veikt greidys saguma restauracejis dorbus 4 zalūs i īīšonys vestibilā. 

  1. Bīdreibys “Jauniešu klubs “Lingua”” projekts “Dances join people!” – pīškierti 488 eiro.

Projekts paradz styprynuot storpvaļstu sadarbeibu ar Lītovu i Boltkrīveju, pīduovojūt vareibu vysaidom sabīdreibys grupom bez moksys pīsadaleit Latiņamerikys deju meistarklasēs. 

Karteņā: 2015. godā atbaļsteitais projekts “Nu reiteņa caldamuos… Sieviešu koris „Medicus” Rēzeknei”. Foto nu “Medicus” arhiva.

Print Friendly, PDF & Email

Nūtikšonu kalendars

May
20
Pīk
19:00 Artura Skuteļa lelkoncerts “Jā” @ koncertzale "Palladium"
Artura Skuteļa lelkoncerts “Jā” @ koncertzale "Palladium"
May 20 @ 19:00 – 22:00
20. majā Reigā, koncertzalē “Palladium” nūtiks latvīšu hip-hopa muzika Artura Skuteļa lelkoncerts i jaunuo albuma “Jā” prezentaceja. Kai lelkoncerta eipašuo gaška ar sovu soloprogramu iz skotuvis kuops ari latgalīšu repere Ūga, kuruos 2020. godā izdūtais[...]