Da 19. marta Reigā, galerejā “Daugava”, var apsavērt Osvalda Zvejsalnieka gleznu izstuodi “Spānija”.

2010. godā Osvalds Zvejsalnieks ceļuojumā īpazyna korstasneigū i zīdūšū Valenseju Spānejā, i nu tuo laika saulainuo i eksotiskuo dīnvydu zeme “dzeivoj” juo iztēlē, nu dzeivē teik radeitys jaunys gleznys par Spānejis tematiku. Izstuodē īspiejams ļautīs sapynim i pusattaiseitom acim spylgtajuos i kūšajuos kruosuos izsapynuot vālūs vokorus Valensejā, kod gaisā smuordoj zīdūšuos magnolejis, suleigī apeļsini i pamozom suoc aust jauns reits.

Izstuodē eksponātuos gleznys radeitys laika periodā nu 2010. da 2015. goda.

Osvalds Zvejsalnieks dzims 1944. goda 21. martā Varakļuonūs, beidzs Latvejis Muokslys akademeju, nu 1976. goda Latvejis Muokslinīku savīneibys bīdrys. Nu 1970. goda struodoj Rēzeknis lītiškuos muokslys vydsškolā, piečuok ir Rēzeknis muokslys koledžys direktors i Muokslys akademejis Rēzeknis filialis vadeituojs. Itūšaļt – Rēzeknis Muokslys i dizaina vydsškolys direktors, LMA profesors.

Nu 1971. goda pīsadalejs vaira nakai 60 nūvoda, vaļsts i storptautyskajuos muokslys izstuodēs, sareikuojs ap 20 personalizstuožu, regulari pīsadola storptautyskajūs plenerūs i grupu izstuodēs i Latvejā, i uorvaļstīs.

Karteņā: Osvalds Zvejsalnieks. “Vidusjūras osta”, 2010. g., audaklys/akrils, 40×50