Daugovpiļs nūvada Leiksnā nu 2016. gods 1. da 3. juļam jau sastū reizi nūtiks leluokais jaunuos latgalīšu muzykys festivals „Muzykys Skrytuļs‟, aicynojūt muzykantus, kuri vysaidūs žanrūs roda dzīsmes latgaliski. Kai informej pasuokuma reikuotuoji, festivals nūtiks treis dīnu garumā i tumā pīsadaleis vairuokys gostu grupys ari nu uorzemem.

Festivalā pīktdiņ skanēs etnomuzyka, sastdiņ dīnys i vokora koncertūs uzastuos latgalīšu jaunuos grupys, sovukuort naktī byus vareiba izbaudeit rokmuzyku, a svātdiņ Leiksnys Vyssvātuos Jezus Sirds Rūmys katuoļu bazneicā nūtiks gareiguos muzykys koncerts.

Niu da 30. apreļam izsludynuota muzykantu dasasaceišona daleibai festivalā. Konkursa nūlykums i dasacejuma anketa muokslinīkim pīejama ite.

Festivals „Muzykys Skrytuļs‟ aizasuoce 2005.godā ar mierki popularizēt latgaliskū identitati i sekmēt jaunu latgalisku dzīšmu radeišonu. Festivala moto ir „Kruot var na tikai naudu‟, deļ tuo festivals visim tuo apmaklātuojim ir bez moksys.

Festivala jaunumim var sekuot leidza socialajūs teiklūs: draugiem.lv/muzykysskrytuls, facebook.com/muzykysskrytuls, twitter.com/LiksnasKN, kai ari organizatoru satys lopā liksna.lv, kai ari cytur var meklēt informaceji piec atslāgys vuorda #skrytuls.

Festivalu tradicionalai reikoj Daugovpiļs nūvoda Kulturys puorvaļde i Leiksnys pogosta puorvaļde.

Pasuokuma organizatori ari aicynoj dasasaceit breivpruoteigūs paleigus festivalā. Teik maklāti informatori, darbneicu vadeituoji, dežuranti i duovonu, puču īdaleituoji. Vaira informacejis i dasacejuma anketu meklej ite.