Jau reit, 3. martā, sovu skaniejumu radejis viļņūs atsuoc raidejumu cykls “Pi myusim Latgolā”, kurymā tiks stuosteits par Latgolā nūzeimeigom nūtikšonom, procesim i personom.

Sovu ceļu pi klauseituoju raidejums “Pi myusim Latgolā” suoce jau 2013. godā. Itūs godu laikā raidejuma veiduotuoji ir apceļuojuši tyvuokys i tuoluokys Latgolys vītys, kab sasatyktu ar pīrūbeža ļaudim, koloritom personeibom i pastuosteitu par tom sovim klauseituojim.

Viņgod raidejuma “Pi myusim Latgolā” komanda pīduovuoja aizraujūšus stuostus par profesionaluos izgleiteibys teņdeņcem, uzjiemiejdarbeibys vareibom, tradicionaluos kulturys atpazeistameibys veicynuošonu, medeju telpu, viesturi, kulturys dzeivis daudzveideibu i cylvākim, kurī Latgolys vuordu nas i sovā sirdī, i lelajā pasaulī.

Ari itūgod da pošu goda beigu īsuoktais dorbs tiks turpynuots, klauseituojim pīduovojūt divejus raidejumus nedeļā par kulturviesturiskom i socialpolitiskom temom.

Tai jau reitdīnys raidejumā “Pi myusim Latgolā” tiks skaidruots, voi ebreju sinagogys ir jauna teņdeņce sakralajā turismā Latgolā, kai ari, cik i kaidus turistus itaids maršruts varātu Latgolai davylynuot.

Raidejumu “Pi myusim Latgolā” klausīs:

Diveju krostu radejā – catūrtdiņ 16.30, pīktdiņ 18.30 (atkuortuojums)

Latgolys radejā – pīktdiņ 11.05, pīktdiņ 16.30 (atkuortuojums)

Radejā Marija Latveja – pīktdiņ 12.10

Vysus raidejumus sevkurā laikā varēs nūsaklauseit ari LaKuGā.