Bārnu gruomotu izdevnīceibā “Liels un mazs” izguojs ilustrātuos latvīšu bārnu dzejūļu izlasis BIKIBUKS jaunais laidīņs, kurymā itūreiz atrūnams ari dzejūļs latgalīšu volūdā.

Ontona Slišāna dzejūli “Agrys reits”, kas ļaun kūpā ar gaileiti pasamūst skaistajūs Latvejis laukūs, ilustriejs muokslinīks i daudzu animacejis kinu autors Vladimirs Leščovs.

Kotram dzejūļam izlasē BIKBUKS atvālāta atseviška gruomoteņa, kū vīnoj muokslinīku Rūtys Briedis i Arta Brieža veiduotais dizains – mozam bārnam parūceigs formats i eipašais serejis logo. Tymā radzams pats Bikibuks – jautrys, ziņkuoreigs i speiteigs ragaiņs, leidzeigs attaiseitai gruomoteņai. Itys nūsaukums i tāls rodīs, skaitūt Juoņa Baltvilka skaitampantu “Biki-buki”, ar kurū 2012. godā tyka aizsuokta sereja.

Kotru goda catūrksni serejā izīt 6 jauni bikibuki. Kūpā paradzāts izdūt 100 vysaidūs laikūs sacarātu dzejūļu, kū ilustriejuši vysaidi myusu dīnu latvīšu muokslinīki. Dzejūli, kū daudzi vacuoki i vacvacuoki īmeiļuoja sovā bierneibā, īt pi šudiņdīnys bierneņu myusdīneigā vizualā izskotā, ar cīnu i pret puorbaudeitom vierteibom, i pret modernū.