Kinai, kas viestej par latvīšu nacionalūs partizanu ceiņu pret padūmu okupaceju piec II Pasauļa kara beigom Latgolā, “Segvārds Vientulis”, planavuots turpynuojums, īspiejams, gruomotys formā. Kinys scenareja leidzautors, viesturnīks Juoņs Viļums ir sajiems jaunus materialus par kinys varūnim i turpynoj dorbu, kab sagataveitu gruomotu par Latgolys partizanim.

9. martā Latvejis Okupacejis muzejā 17.00 byus vareiba sasatikt ar J. Viļumu i kinys “Segvārds Vientulis” režisoru Normundu Puci. Piec sarunys paradzāts kinys seanss. Īīšona sareikuojumā byus pret zīduojumu kinys veiduotuojim, informej muzeja puorstuove Leiga Strazda.

Kina “Segvārds Vientulis” baļsteita patīsuos nūtikšonuos, kuruos nūtyka Leivuona apleicīnē 1945. godā piec padūmu okupacejis atsagrīsšonys. Vonogu draudzis katuoļu prīsters Ontons Juhnevičs bazneicys saimisteibys telpuos globuoja vītejūs veirīšus nu mobilizacejis vuocu i sorkonajā armejā. Sovys puorlīceibys deļ, tics konfliktā ar varu, jis beja spīsts izaškiert par radikalu sūli.

Kina ”Segvārds Vientulis” ir inscenāta dokumentala kina. Tok kinys veiduotuoji skaita, ka dramatiskuo tema ir tik īmeslis, kab runuotu par cylvāka dzeivis eksistencialajom izvielem. Uzticeiba i varūneiba, kurai leidza dzeivoj nūdeveiba i gļāvums voi gribiešona vīnkuorši izdzeivuot – tū vysu var īpazeit, sekojūt Ontona Juhneviča i juo ceiņu bīdru liktinim.

Kina uzjimta 2014. godā, tuos garums — 90 min. Lūmuos: Varis Piņķis, Vilis Daudziņš, Edgars Samītis, Andris Bulis, Jurs Bartkevičs, Jurs Jope, Rihards Rudāks, Māris Korsietis, Egils Viļumovs, Ritvars Gailums, Edgars Pujāts, Egons Dombrovskis, Valdis Bisenieks. Muzyku komponēja Rihards Dubra.