Martā Lūznovys muiža aicynoj izbaudeit divejis koncertprogramys – grupys “Rūnas” debeja koncertā īveitūs tautyskūs rokstus i kamerorkestra “Sinfonietta Rīga” solistu izspālātuos “Zelta baroka virsotnes”, informej muižys puorvaļdneica Iveta Balčūne.

13. martā 15.00 Lūznovys muižys gostim pyrmajim byus vareiba byut kluotyn pīdzimšonys Muzys dīnā – sovu pyrmū eistū koncertu snēgs jauna, Rēzeknē radeita grupa “Rūnas”, kurymā Juoņa Mežinska vadeibā apsavīnuojuši vairuoki muzykali Rēzeknis pusis ļauds, kab ar bolsu i vysaidim instrumentim (vejūle, gitara, flauta i cytim) kūpā radeitu eipašu skaniejumu. Grupys programys pamatā ir sovs redziejums par latgalīšu i latvīšu dainom, kai ari dasadūršona pasauļa muzykai i dainu savynums originalmeļdeņūs. Grupa “Rūnas” prīcojās i apsazynoj tū lelū spāku, kas īlykts tautys muzykā, i car itim tautys rokstim raudzēs izprast i paruodeit cylvāka vītu vysumā. Kab debeja koncertu padareitu eipašuoku, “Rūnas” aicynuos apmaklātuojus ļautīs sasadzīduošonys burveibai Lūznovys muižys Sorkonajā zalā.

Nedeļu piečuok, 19. martā 15.00, muižā pyrmū reizi gastēs Leluos muzykys bolvys 2015 laureata nominacejā “Par izcilu sniegumu” kamerorkestra “Sinfonietta Rīga” solisti, kas apsavīnuojuši eipašā ansamblī, kurs klauseituojus prīcynuos ar koncertprogramu “Zelta baroka virsotnes”. Muižā skanēs Agnesis Kanniņas-Liepiņas vejūle, Juoņa Stafecka kontrabass, Juoņa Semjonova fagots. Taipat ansamblī muzicej ari tikū Lelū muzykys bolvu “Par izcilu darbu ansamblī” sajāmušuo flautiste Ilona Meija, kai ari muzikim pīsavīnuos izcyluo i storptautyski atzeituo, nu reizē ari Rēzeknis pusei “sovejuo” klavesiniste Īva Saliete. Programā “Zelta baroka virsotnes” izskanēs Vivaldi, Baha, Tēlemaņa, Buamortjē i Faša baroka muzykys dorbi vysaidim ansambļu sastuovim.

Koncertus organizej Lūznovys muiža, nu tūs atbolsta Rēzeknis nūvoda dūme i Vaļsts kulturkapitala fonds. Beleti iz koncertim īprīškpuordūšanā atrūnami “Biļešu Paradīze” kasēs (tyvuokuo Lūznovai ir Latgolys viestnīceibā GORS, Rēzeknē) voi rezervejamys, rokstūt muiza@luznava.lv voi zvonūt 29390701.

Apreļa pasuokumu programa Lūznovys muižā turpynuosīs ar Argentinys temai veļteitom Gordiežu vakareņom 1. aprelī, “Rīgas saksofonu kvarteta” i solistis Kristīnis Gailītes koncertu 2. aprelī i eipaši gaideitajom 24. apreļa nūtikšonom – koncertizvadumu “Čurļoņa pasaule”, kurymā muzicēs komponista i gleznuotuoja Mikalojus Konstantina Čurļuoņa mozmozdāls, lītaunīku pianists Roks Zubovs, jaunuo Lūznovys muižys flīgeļa īskandynuošonu i diveju Čurļuoņa dorbu izstuožu atkluošonu.