26. martā 11.00 Kuorsovys nūvoda Malnovys cīma maizneicā “Dzīles” teik reikuotys suprātkys, kas veļteitys Leldīņu tradicejom, informej Kuorsovys nūvoda turisma organizatore Inga Bernāne. Kūpā ar saimineicu Ainu Barsukovu gosti kruosuos ūlys i ceps Leldīņu maizi.

Kulturys zeimis “Latviskais mantojums” nesieja maizneica “Dzīles” i tuos saimineica Aina Barsukova, kas puorstuovēja Latgolu LTV šovā “Īstās latvju saimnieces” pavasara saulgrīžu laikā sovim gostim pīduovoj izzynuot Leldīņu tradicejis. Ūla senejajim latvīšim apzeimuoja dzeiveibys nesieju i saulis simbolu, partū tūs rūtuošonai tyka veļteita eipaša viereiba. Kūpā ar saimineicu gosti izzynuos ūlu kruosuošonys paražys Latgolā, īsavuicūt gatavēt Leldīņu maizi i pavadeis piecpušdīni eistyn latviskuos nūskaņuos.

Daleibys moksa pīaugušajim ir 7 eiro, bārnim – bez moksys. Vaira informacejis i dasasaceišona (da 22. marta), zvonūt 26538016.

Suprātku dalinīki ir aicynuoti leidza jimt ūlys, dzejis dīgus i dobys materialus, kab varātu pasadaleit ar sovys dzymtys ūlu kruosuošonys tradicejom i kūpā pīpiļdeit Leldīņu skalini ar skaistom i raibom ūleņom.