Lūznovys muižā n da 22. apreļa apsaverama fotomuokslinīka Leonida Važnuo analogūs retro fotografeju izstuode “Pagātne mūsdienās”, kurymā apsaverami 20 dorbi itūšaļt reši izmontuotā fotografiešonys tehnikā.

Fotografs Leonids Važnais par sovu aizaraušonu ar analogū ratū fotografeju, ar kurū myusu dīnuos pasaulī nūsadorboj cīši moz fotografu, pamatā Amerikā, nadaudz Eiropā i Krīvejā, stuosta: “Analoguo sudobra procesa fotografeja, tei nav vīnkuorši fotografeja, tei ir sova veida burvesteiba! Process, kai teik veiduota autentiskuo fotografeja nu sasagataveišonys, gaismu uzstuodeišonys šaļts da gotova attāla, ir ļaušonuos, partū ka tuo laikā navar nikuo palobuot voi “pasavērt, kai saīt”. Mes varam tik paredzēt, kaids byus rezultats. Fotografa i fotografejamuo mejīdarbeibā veidojās eipaša atmosfera, kurū vēļreiz atkuortuot nabyus īspiejams, partū īmyužynuošonys šaļtei ir taids magnetiskuos pīviļceibys spāks. Analogajai retro fotografejai pīmeit fotografisks cālums, cīneigums i reizē tei ir paguotne myusu dīnuos.”

Izstuodis autors L. Važnais dzims Rēzeknis rajonā, profesionali ar fotografiešonu nūsadorboj vaira nakai 15 godu, itūšaļt ir na viņ fotografs, nu ari pasnīdziejs, “LeonFoto” fotoškolys Austrumlatvejā (Rēzeknē) dybynuotuojs i vadeituojs. Sovu profesionalū darbeibu ir suocs kai portretists, piečuok ir struoduojs modeļu fotografejis jūmā. Asociativū fotografeju vuicejīs pi ungaru fotomuokslys meistara Balaša Bjoreca. Studiejs modernū muokslu Eiropys humanitarajā universitatē Viļņā. Īmeiļuotuokais vierzīņs fotografejā – piktorealisms i asociativuo fotografeja, autora lobuokī dorbi ir veiduoti taišni itymā stilā. Fotomuokslinīks ir vairuoku foto konkursu laureats, juo dorbi tykuši izstuodeiti i tepat Latgolā (Rēzeknē, Daugovpilī, Ludzā), i Reigā i uorvaļstīs.

Lobuok ar autoru i juo dorbim var īsapazeit: http://leonfoto.blogspot.com