Nūtikšonom boguotais Juoņa Streiča jubileja gods

Nūtikšonom boguotais Juoņa Streiča jubileja gods

juons streics

Piec nedelis ar poša režisora Juoņa Streiča vadeitu meistarklasi suoksīs Streiča kinogods, kas pīduovuos ari izstuodis, diveju digitalizātu i restaurātu kinu pyrmizruodis, kai ari gruomotys attaiseišonu i cytys nūtikšonys.

Treis trešdīņu vokorus, 13. aprelī, 20. aprelī i 27. aprelī, kinoteatra “Splendid Palace” Mozajā zalā nūtiks Streiča meistarklasis, kotru vokoru veļtejūt cytai temai. Itymūs vokorūs režisors stuosteis par sovom kinom, tiks demonstrāti tūs fragmenti, kurūs papyldynuos Streiča komentari. Meistarklašu moderatore byus kinokritike Daira Āboliņa. Pyrmuo meistarklase byus “Streičs un aktieri”, ūtrei – “Cilvēks, vārds un lietas”, trešuo – “Streičs inscenē literatūru”. Meistarklasis byus bez moksys, i režisors byus eipaši prīceigs, ka tuos apmeklēs studenti.

Sovukuort septembra beiguos skateituojim tiks nūdūtys divejis kūpā ar Streiču atlaseitys i digitalizātys režisora veiduotys kinys. Vīna nu tūs ir 1983. goda kina “Svešās kaislības”, kas ir šedevrs, tok vysaidu īmesļu dieļ tū ir redziejuši moz skateituoju. Ūtrei kina ir 1975. godā uzjimtuo “Mans draugs – nenopietns cilvēks”.

26. septembrī Reigys Svātuo Pītera bazneicā paradzāts atkluot Streiča gleznu izstuodi, sovukuort “Galerijā Centrs” 27. septembrī tiks atkluota ceļojūšuo izstuode.

Rudinī Reigys storptautyskuo kinofestivala laikā tiks reikuota storptautyska zynuotniskuo konfereņce, kurymā tiks reflektāts par Streiča kinom, sovukuort oktobrī nūtiks nacionalais kinu festivals “Lielais Kristaps”, kas tiks atkluots ar restaurātū Streiča kinu, kai ari eipaši tiks gūdynuots ari pats režisors.

Kinokritike Daira Āboliņa gatavej gruomotu par Streiču, kas byus na tik hronologisks redziejums par vysom Streiča uzjimtajom kinom, nu ari saruna ar pošu režisoru.

Sovukuort oktobra suokuos Latgolys viestnīceibā GORS nūtiks muzykals pasuokums, kurymā sasatiks Streiča akteri ar juo kinu muzykys autorim. Itū pasuokumu veidoj režisora meita Viktorija Streiča, kas ir Kaunis Muzykaluo teatra režisore i vodūšuo aktrise.

Juoņam Streičam 80 godu paliks 26. septembrī.

Print Friendly, PDF & Email

Nūtikšonu kalendars

Nov
7
Sai
16:00 Catūrtais pasauļa diktats latgal... @ Vyss pasauļs
Catūrtais pasauļa diktats latgal... @ Vyss pasauļs
Nov 7 @ 16:00
Catūrtais pasauļa diktats latgalīšu rokstu volūdā @ Vyss pasauļs
Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs[...]