Atkluos Zīmeļlatgolys velomaršrutu “Rypoj vasals!”

Atkluos Zīmeļlatgolys velomaršrutu “Rypoj vasals!”

VeloVelomaršruta “Rypoj vasals!” atkluošonys dīnā, 21. majā, Bolvu, Viļakys, Kuorsovys, Baļtinovys i Ruguoju nūvodi ir sagatavejuši grandiozu pasuokumu programu na tik aktivajim velobrauciejim, nu ari cytu sajiutu baudeituojim Zīmeļlatgolā, informej Kuorsovys nūvoda turisma organizatore Inga Bernāne. Svineiguo velomaršruta nr. 34 atkluošonys šaļts Zīmeļlatgolā nūtiks 11.00, kod kotrā nūvodā tiks grīzta svineiguo lenta i palaisti braucīnī pyrmī velosipedisti.

Bolvu piļsātā piec 11.00 i mozi, i leli ir aicynuoti iz paruodis velobraucīni “Pretī vasarai”, kur eipaši tiks sveikti tī, kas pīdūmuojuši pi sova i velosipeda vizualuo tāla. Sovukuort 11.50 interesenti teik aicynuoti dūtīs velomaršruta “Rypoj vasals!” atkluošonys braucīnī nu Bolvu da Ruguoju, kurymā ir īkļautys ari vairuokys atpyutys vītys nasteidzeigajim, nu sportiskajim velobrauciejim, kam rezultats ir nu svora, 11.40 tiks dūts starts velobraucīņam “Bolvi-Ruguoji” ar kūpejū garumu 18 km. Nu 12.00 Bolvu piļsātys parkā bārnim i jūs vacuokim tiks organizātys velostafetis i aktivuo piecpušdīne. Dīnys programys nūbeigumā nu 20.00 Bolvu nūvoda muzejā programa “Kas ir aiz durvīm?” Muzeju nakts ītvorūs.

Viļakā jau nu 9.00 nūtiks lauku lobumu tierdzeņš, iz kurū eipaši aicynuoti pircieji ar velosipedim. Sovukuort piec svineiguos velomaršruta atkluošonys nūtiks velobraucīņs iz Medņovys pogosta centru Semenovu, kur vysus sportiskūs brauciejus sagaideis aktivitatis jautrai piecpušdīnei Zīmeļlatgolā. Viļakys nūvoda muzejā nu 19.00 Muzeju nakts programa “Jaunas durvis atveras tikai tad, kad vecās aizveras”.

Kuorsovys nūvodā iz reizis piec Zīmeļlatgolys velomaršruta atkluošonys nūtiks fotoveloorientiešonuos saceņseibys “Rypoj vasals Kuorsovā!”, kurūs gaitā komandys īpazeis Kuorsovys piļsātu i tyvuokū apleicīni, pyldūt atjauteibys aizdavumus i atraktivi pavodūt laiku. Nu 15.00 vysi teik aicynuoti iz Latgolys šmakovkys dadzynuotovys atkluošonys festivalu, kuruo programā ir sātys ražuotuoju lobumu tiergs, Baļtinovys teatra “Palādas” izruode “Ontans i Anne”, svineiguo atkluošona i zaļumbals da reita gaismys ar Zinti Krakopu.

Baļtinovā ar lentys grīsšonys šaļti tiks atkluots orientiešonuos braucīņs pa Baļtinovys īlom, izzynojūt vēļ nazynomū par mozuokū Latvejis nūvodu i izbaudūt Baļtinovys nūvoda gostmīleibu.

Ruguojūs pavasara godatierga rūseiba byus jiutama jau nu 9.00, ite velosportisti aicynuoti īsastyprynuot ar lauku lobumim pyrma aktivuo dīnys cielīņa. Ruguoju parka teritorejā nu 10.00 bārni i jaunīši varēs vērtīs i poši pīsadaleit ritiņbraukšonys paraugdemonstriejumūs ar škieršļu jūslu, sovukuort Ruguoju parkā paraleli nūtiks ari atjauteibys spēlis i viktorina “Zini vai mini Rugāju novadu”, eipaši aicynuotys saimis. Piec svineiguos atkluošonys nūtiks veloorientiešonuos saceņseibys 18 km garumā pa Ruguoju nūvodu, vokorā nu 20.00 Ruguoju nūvoda muzejs aicynoj iz Muzeju nakts programu.

Da 1. maja SIA “Sports S” pastateis Zīmeļlatgolys velomaršruta nr. 34 “Rypoj vasals!” velonūruodis Kuorsovys, Baļtinovys, Bolvu, Ruguoju i Viļakys nūvodu teritorejuos, kūpā 180 nūruožu zeimis.

Print Friendly, PDF & Email

Nūtikšonu kalendars

Nov
25
Pīk
20:00 Grupys “Tautumeitas” koncerts @ Ādažu kulturys centrs
Grupys “Tautumeitas” koncerts @ Ādažu kulturys centrs
Nov 25 @ 20:00 – 22:00
Etno muzykys grupa “Tautumeitas” piec veiksmeiga lelkoncerta vosorys izskaņā Skultis ūstā izsludynoj jaunuokuo albuma “Skrejceļš” rudiņa koncertturi, kuruos laikā gasteis 8. oktobrī Daugovpilī, 22. oktobrī Olyuksnā, 23. oktobrī Valmīrā, 4. novembrī Talsūs, 5. novembrī Līpuojā,[...]
Nov
26
Sai
13:30 Ligijis Purinašys dzejis kruojum... @ Nacionalais Botaniskais duorzs
Ligijis Purinašys dzejis kruojum... @ Nacionalais Botaniskais duorzs
Nov 26 @ 13:30 – 15:00
Ligijis Purinašys dzejis kruojuma "pierobežas" eksotiskī skaitejumi @ Nacionalais Botaniskais duorzs
Registraceja daleibai pasuokumā ITE