Itūreiz raidejumā par festivala “Muzykys skrytuļs” konfliktu ar latgalīšu muzikim. Itūvosor latgalīšu muzykys festivals otkon nūtiks Leiksnā, tok vairuokys zynomys latgalīšu grupys napīsadaleis festivalā. Festivals lyudz muzikus syuteit dasasaceišonys anketys, muziki tū atsasoka dareit. Jī gryb, kab organizatori poši sasazynoj ar muokslinīkim, kurūs gryb redzēt festivalā, kluot vēļ lyudz simbolisku samoksu par uzastuošonu. Muziku redzīni izkluosta Guntis Rasims nu “Bez PVN” i “Jezups i Muosys”, sovukuort tū, kū dareis organizatori, ka zynomūs grupu festivalā nabyus, skaidroj vīna nu reikuotuoju, Leiksnys tautys noma direktore Sanita Pinupe.

Suocūtīs Juoņa Streiča kino godam, raidejums pīduovoj fragmentu nu juo intervejis 2012. godā.

Sovukuort Teņs Bikovskis skaidroj, kas ir lingvistiskuo karte i kū ar tū var dareit. Taida volūdu karte pyrmū reizi radeita Latvejā – škārsteikla datubazē iz kartis izvītuota volūdnīceibys viesture nu 13. godu symta. Audio i video materialūs, karteņuos i tekstūs ir ari latgalīšu volūdnīceibys nūzeimeiguokuos nūtikšonys, vītys i personeibys.