Veronika Dundure izvierzeita apbolvuojumam “Laiks Ziedonim”

Veronika Dundure izvierzeita apbolvuojumam “Laiks Ziedonim”

laiks ziedonimImanta Zīdūņa fonda dybynuotuoju i vizionaru sanuoksmē nūskaidruoti apbolvuojuma “Laiks Ziedonim 2016” nominanti kategorejā par dzeivi literaturā “Bize”. Iz laureata titulu preteņdej septenis latvīšu volūdys i literaturys školuotuojis nu dažaidu Latvejis nūvodu. Nominantu vydā Latgolu puorstuov Veronika Dundure nu Rogovkys. Laureate tiks paziņuota cyldynuošonys ceremonejā 3. majā, Imanta Zīdūņa dzimšonys dīnā.

Apbolvuojumam nominātys ari Muora Dzērve, Daina Štokmane i Daiga Zirnīte nu Reigys, Vija Cerusa nu Bauskys, Dace Kruonīte nu Neretys i Zinta Saulīte nu Madlīnys.

Veronika Dundure ir Nautrānu vydsškolys literaturys školuotuoja, kurei voda ari Latgalīšu volūdys, literaturys i kulturviesturis školuotuoju asociaceju i puļcej ituo dorba entuziastus vosorys nūmetnēs “Vosoruošona”. V. Dundure īsastuojuse par nūvodu vuiceibys īvīsšonu vysuos Latvejis školuos. Školuotuoju Veroniku juos bejušī školāni raksturoj latgalīšu dyžgora Andryva Jūrdža vuordim: “Skudra, koč moza, bet kolnus rauš. Vysu gryutuokais dorbs palīk par vīglu, jo tū ar prīcu un patikšonu dareisi.”

Apbolvuojums nominacejā par dzeivi literaturā “Bize” tiks padūts literaturys školuotuojai, kurei sasnīguse izcileibu sovā dorbā, ar degsmi vuicūt meiļuot i saprast literaturu, īdvasmojūt jaunīšus skaiteit gruomotys. Ituo gods žūrejis vadeituoja, Reigys Juglys vydsškolys direktore, literaturys školuotuoja Aija Melle dorbojās komandā ar kompetentim vizionarim – dzejneicu Muoru Zuoleiti, žurnalistim Līgu Blauu i Aivaru Berki, literaturkritiki Īvu Kolmani, fonda “Viegli” dybynuotuoju Žaneti Grendi i rakstneicu Inesi Zanderi, kurei ir apbolvuojuma “Laiks Ziedonim” 2015. goda laureate.

Itūgod apbolvuojumam “Laiks Ziedonim” tyka sajimts vaira par 170 dasacejumu, nu tim nominacejā Dzeive literaturā dasaceiti 40 školuotuoji (nazcik pat vairuok reižu). Vizionari ryupeigi viertēja dasacejumus, kurūs autori beja školuotuoju asūšī i bejušī audziekni, i sasatyka ar finalistem kluotīnē, īsadzilinojūt jūs dorbā.

Imanta Zīdūņa fonds “Viegli” apbolvuojumu “Laiks Ziedonim” īdybynuojs 2014. godā, kab īdvasmuotu, nūvierteitu i cyldynuotu jaunradi, kai ari dzejnīkam Imantam Zīdūņam svareiguos vierteibys – izcileibu, degsmi, syuteibu, stuoju, veiksmi i sovpateibu, kas jau trešū godu teik vaicuotys sevkura pretendenta personeibuos. Tei ir vareiba sevkuram pamaneit i izceļt kaidu sovu nūvodnīku, dorba devieju, kolegi voi aktivu jaunīti. Ari itūgod apbolvuojums tiks padūts pīcuos nominacejuos. Laureatus atbolsta mecenati Boriss i Ināra Teterevi, nodrūsynojūt kotrys nominacejis laureatam naudys bolvu 3000 eiro apmārā.

Print Friendly, PDF & Email

Kalenders

May
21
Ūtr
15:00 Izstuodis “Juoņs nu Dzeņagola” a... @ Latgolys Kulturviesturis muzejs
Izstuodis “Juoņs nu Dzeņagola” a... @ Latgolys Kulturviesturis muzejs
May 21 @ 15:00 – 16:30
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]