Jaunuos latgalīšu muzykys festivala “Muzykys Skrytuļs” reikuotuoji atguodynoj, ka dasasaceit daleibai festivala koncertūs var da 30. apreļam. Dasacejums juonūsyuta iz epostu skrytuls@gmail.com da 16:00 stuņdem, kluot pīvūnojūt 2-3 fotografejis. Konkursa nūlykums i dasacejuma anketa muokslinīkim pīejama ite.

Daugovpiļs nūvada Leiksnā itymā vosorā nu 1. da 3. juļam jau sastū reizi nūtiks leluokais jaunuos latgalīšu muzykys festivals „Muzykys Skrytuļs‟, aicynojūt muzykantus, kuri vysaidūs žanrūs roda dzīsmes latgaliski.

Festivalā pīktdiņ skanēs etnomuzyka, sastdiņ dīnys i vokora koncertūs uzastuos latgalīšu jaunuos grupys, sovukuort naktī byus vareiba izbaudeit rokmuzyku, a svātdiņ Leiksnys Vyssvātuos Jezus Sirds Rūmys katuoļu bazneicā nūtiks gareiguos muzykys koncerts.

Festivals „Muzykys Skrytuļs‟ aizasuoce 2005.godā ar mierki popularizēt latgaliskū identitati i sekmēt jaunu latgalisku dzīšmu radeišonu. Festivala moto ir „Kruot var na tikai naudu‟, deļ tuo festivals visim tuo apmaklātuojim ir bez moksys.

Festivala jaunumim var sekuot leidza socialajūs teiklūs: draugiem.lv/muzykysskrytuls,facebook.com/muzykysskrytuls, twitter.com/LiksnasKN, kai ari organizatoru satys lopā liksna.lv, kai ari cytur var meklēt informaceji piec atslāgys vuorda #skrytuls.