Da decembra Preiļu 1. pamatškolys muzejā (Daugovpiļs īla 34) apsaverama Preiļu viesturis i lītiškuos muokslys muzeja kruojuma izstuode “Kalējs kala, smēde dedza…”, informej muzeja puorstuove Silvija Ivanovska. 

Kaļvs roduos reizē ar dzeļzi i juo omots ir vīns nu senejuokajim. Par tū, ka itaidi veiri dzeivuojuši, viestej līceibys, kas atrostys piļskolnūs i senejuos apmetnēs. Jau vālajā dzeļža laikmatā kaļvi suokuši atteisteit sovys prasmis kaidā nūteiktā vierzīnī – vīns kola īrūčus, cyts – dorbareikus, nu kaids cyts beja rūtu meistars. Piečuok, kod kaļvi struoduojuši muižkungu pakļauteibā, jim nav bejušys breivys rūkys, kab dareitu kū i cik gryb. Vysupyrma beja juoizkaļ nūteikts apjūms muižys vajadzeibom i tik tod dreikstēja kaļt ari cytim, nūpeļnejūt sev iztyku. Kaļvi izgataveja lauksaimisteibys i omotnīceibys dorbareikus, patmaļu i celtņu dzeļža detalis, apkola zyrgus, rotus i rogovys.

Taipat kai seņuok, ari šudiņ kaļvs dora vērtini dorbu – veidoj metalkolumus, sātmaļus, gatavej dorbareikus, tok puorsvorā dora dorbu piec pasyutejuma.

Izstuodē kaļva omota reiku iztureibu i dažaideibu atkluoj vys vēļ pīlītojamī Preiļu pogosta vacuo kaļva Sigismunda Sondora dorba instrumenti, kurūs saglobuojs i muzejam atvieliejs juo dāls Pīters Sondors.

Puorlīcynūšu omota meistara prasmi sovūs kolumūs demonstrej Arvīds Mežinskis nu Mežinskim Rušyunys pogostā.

Izstuodis eksponatu vydā apsaverami ari Rēzeknis Muokslys i dizaina vydsškolys Metala izstruoduojumu dizaina izgleiteibys programys pedagoga, metalmuokslinīka Norberta Kudiņa studentu rodūšūs ideju rysynuojumi.

Īprīkšeja dasasaceišona izstuodis apmekliejumam dorbadīnuos – tel. 26742058