Dadzynuotovys saiminīks Juoņs Krivtežs aicynoj 21. majā dūtīs iz Kuorsovys nūvodu, Malnovu – “Latgolys šmakovkys” atkluošonys svātkim, kur varēs baudeit izslavātū latgalīšu gasteibu, degustēt pošdzeitū šmakovceņu, gordi paēst, izasmīt Baļtinovys teatra “Palādas” komedejizruodē “Ontons i Anne” i laistīs jestrūs daņčūs bičkā, informej Kuorsovys nūvoda sabīdryskūs attīceibu specialiste Inese Krivmane.

Kuorsovys nūvoda Malnovys muižys pīnuotovys ākā 21. majā tiks attaiseita “Latgolys šmakovkys” dadzynuotova. Šmakovkys tradicejis Malnovā ir dzymušys 1827. godā, kod grafa Nikolaja Šadurska laikā tyka izcalts pyrmais bryuzs. Nu tuo laika recepts nav byuteigi pasamainejs, šmakovka teik taiseita nu Latvejā augušim gryudim i pošu sātys īsola. “Latgolys šmakovkā” byus vareiba paraudzeit jau senejūs laikūs nūsleipātys garšys.

Gosti teikt aicynuoti 15.00 pi “Latgolys šmakovkys” dadzynuotovys iz sātys ražuotuoju tiergu, kur varēs i paraudzeit, i nūpierkt gordus kiupynuojumus, sīrus, maizi i cytus Latgolā izlūluotus gordumus.

18.00 nūtiks svineiga atkluošona, kur degustacejuos byus vareiba izgaršuot Latgolys šmakovku i seviški sagataveituos uzkūdys.

Latgalīšu humora mīļuotuojim 19.00 byus vareiba izasmīt Baļtinovys teatra “Palādas” izruodē “Ontans i Anne” – koloriti personaži, lauku cylvāku seikstums i humora dzierksts.

Dīnys nūslāgumā 22.00 gosti meilai aicynuoti izbaudeit daņčus i ļustis bičkā, kur spieļuos Zintis Krakops.

Īīšonys moksa vysys dīnys izklaidis pasuocīnim 7 eiro. Vaira informacejis par pasuocīni: www.latgalessmakovka.lv.