Vairuokys latgalīšu sabīdriskuos organizacejis parakstejušys Reigys dūmei adresātu viestuli ar aicynuojumu kaidu nu Reigys īlom nūsaukt Latgolys politiķa, kulturys i sabīdryskuo darbinīka Franča Trasuna vuordā.

Ituo goda 6. aprelī palyka 90 godi nu izcyluo vaļstsveira, gareidznīka i literata Franča Trasuna (1864 –1926) aizīšonys myužeibā. Sova pīpiļdeituo i tragiskuo myuža beigys jis pavadeja Reigā, saceits dūmei adresātajā viestulē. Trasuna davums Latgolai i latgalīšim ir lels, pošu byutiskuokū dažūs vuordūs izsacejs Vaļsts prezidents Juoņs Čakste: Francis Trasuns Latvejis gierbūnī īlyka trešū zvaigzni – Latgolu.

Latvejis vaļsts symtgadis svieteišona suoksīs Latgolā ar Latgolys kongresa symtgadis atzeimiešonu 2017. goda aprelī i majā. Īcarātys ir daudzys nūtikšonys, tymā skaitā ari pīminis vītys īreikuošona Rēzeknē, kongresa nūrisis vītā, tymā pošā laikā Reigā plašuoki pasuokumi nav paradzāti. Partū, sagaidūt vaļsts symtgadi, kai cīna aplīcynuojums Francim Trasunam, radzamuokajam ceineituojam par Latgolys apsavīnuošonu ar Vidzemi i Kūrzemi vīnā vaļstī, byutu kaidys golvyspiļsātys īlys puorsaukšona ituo Latvejis izcyluo veira vuordā, nūruoda viestulis autori.

Plašuoku rokstu par F. Trasunu var skaiteit LaKuGys arhivā: “Franča Trasuna ceņtīni latgalīšu apvīnuošonā ar puorejim latvīšim”.

Karteņa: momenti.lv