Folklorys kūpa “Upīte” izdavuse daņču DVD

Folklorys kūpa “Upīte” izdavuse daņču DVD

vuoksBīdreiba “Upītes jauniešu folkloras kopa” 2014. goda pošuos beiguos pīraksteja i Vaļsts kulturkapitala fonds atbaļsteja projektu, kurymā tyka apsajimts izveiduot Zīmeļlatgolys daņču i rūtaļu DVD disku, kas iz prīšku školuos, tautys nomūs, folklorys kūpuos nūderēs kai vuiceibu leidzeklis daņču i rūtaļu vuiceišonā. Vysu 2015. godu tyka smogi struoduots, pylnveiduota Upeitis kapelys spielētprasme ar Dinu Liepu i Lieni Brenci, dzīduošonys prasme ar Zani Šmiti, kai ari rūtalis i daņči ar Ernestu Spīču.

Sasavuicejuši labi dzīduot, spielēt i doncuot, gostūs aicynuom Gunti Rasimu, kas mums i īraksteja kapelu, i fiļmēja daņčus. Vysu padarejom da paguojušuo goda rudiņa, nu tod suocēs daņču montiešonys dorbi, kū Guntis padareja cīši labi. Ligita i Andris izveiduoja daņču aprokstus, Lolita sazeimēja daņču sūļus, Liene, Kate i Domeniks saraksteja nūts. Domeniks izzeimēja DVD diska golvonū zeimiejumu, nu Artūrs mums saveiduoja kūpā dizainu i bukleta maketu.

Vysi kūpā, struodojūt lelā komandā, padarejom lelu dorbu, kas ir lels īguļdejums Zīmeļlatgolys i vysys Latvejis daņču i rūtaļu vuiceišonys pylnveiduošonā. Itaida veida projekts, kū realizēja folklorys kūpa “Upīte” ir vēļ da šam nabejuse nūtikšona vysys Latvejis viesturē, partū ka albumā “Dzīduot muoku, doncuot muoku” īkļauti div diski: CD ar daņču meļdenim i DVD ar daņču i rūtaļu apvuiceibu, kur kotrys daņcs voi rūtaļa ir paskaidruots, kai tys juodoncoj i papyldus vēļ dalykts buklets ar nūtim, daņču aprokstim i sūļu i satvierīņu zeimiejumim.

Itūgod, 1. majā, aicynuom sovus draugus i atbaļsteituojus gostūs, partū ka gribiejom atruodeit jaunū disku, pasaceit paļdis atbaļsteituojim i vīnkuorši i jauki atsapyust, kūpā doncojūt i rūtaļuos eimūt. Svātki beja sadaleiti treis daļuos. Pyrmajā daļā Upeitis kapelys skaņajā muziciešonā folklorys kūpys doncuotuoji nūdoncuoja vairuokys dejis, atruodūt sovu doncuotprasmi, kai ari nūsavērem Bolvu Vaļsts gimnazejis deju kūpys “Purenīte” prīšknasumus, kur vīnu deju jī nūdoncuoja ar folklorys kūpys “Upīte” dzīsmi “Kur tu skrīsi vanadzini” Artūra Slišāna apdarē. Ūtrajā daļā puorguom pi daņču i rūtaļu apvuiceibys, izkustynojūt vysus lelus i mozus. Nu trešajā daļā mums kapela “Adzele” i “Zānu kapela” izduovuoja zaļumbala sajiutu, spielejūt balu da pošys pusnakts.

Lela prīca pošim par padareitu dorbu! Kai ari lels paļdis Irēnai Slišānei, kas leluokū daļu nu doncuotuoju ir izaudzynuojuse nu agrys bierneibys, vuicūt meiļuot tradicionalū kulturu! Lels paļdis Ilonai Bukšai par lelu īguļdejumu Upeitis kapelys muzykantu audzynuošonā!

vkkf mozs

Teksta autors: Namaterialuos kulturys montuojuma centra “Upīte” direktors Andris Slišāns

Print Friendly, PDF & Email

Kalenders

Feb
22
Cat
10:00 Seminars “Konfesionālās attiecīb... @ Latvejis Universitatis Latvejis viesturis instituts
Seminars “Konfesionālās attiecīb... @ Latvejis Universitatis Latvejis viesturis instituts
Feb 22 @ 10:00 – 12:00
22. februarī 10.00 stuņdēs kluotīnē, Kalpaka bulvarī 4, 108. telpā nūtiks seminars LU Latvejis viesturis instituta akademiskuo omota pretendentim. Tymā tiks snāgts ziņuojums par īprīšk sagataveitu temu.   Seminara programa: 1. Tatjana Bogdanoviča. “Konfesionālās attiecības[...]
Feb
23
Pīk
18:00 Ūtrais čangaļu saīts ci latgalīš... @ Ūzulainis tautys noms
Ūtrais čangaļu saīts ci latgalīš... @ Ūzulainis tautys noms
Feb 23 @ 18:00 – 23:00
23. februarī nu 18.00 da 23.00 stuņžu Ūzulainis tautys nomā nūtiks ūtrais “Čangaļu saīts ci latgalīšu olimpiade”, aicynojūt iz prīceigu i gordu laika pavadeišonu latgaliskā atmosferā. Tei nav tipiska olimpiade, jo tamā varēs: pasasmīt par[...]