Latgolys Kulturys centra izdevnīceibā izdūta rakstnīka Ontona Rupaiņa romanu trilogeja “Māra mostas”. Tys ir pyrmais ituo Latgolys viesturei veļteituo vierīneiguo prozys dorba izdavums Latvejā, partū ka romanu trilogeja radeita, rakstnīkam trymdā asūt, i izdūta “Latgaļu izdevnīceibā” Minhenē, Rēzeknis nūvoda sātys lopā informej O. Rupaiņa muzeja vadeituoja Olga Pekša.

800 puslopu bīzuo gruomota niu izguojuse, pasasokūt ilggadejam Latgolys Kulturys centra izdevnīceibys dybynuotuojam i vadeituojam Juoņam Elksnim i juo komandai, kai ari Ontona Rupaiņa dālam Juoņam Rupaiņam, kurs dzeivoj ASV, Denverā.

Juoņs Elksnis godu gaitā nu jauna izdevs jau vairuokys O. Rupaiņa gruomotys: “Tauta grib dzeivōt”- 1991. g., “Jaunō skūlōtōja”- 1991. g., “Pasaules vējos”- 2000. g.. Paradzāts izdūt nu jauna O. Rupaiņa viesturiskū romanu divejuos daļuos “Baltie tēvi”, kas veļteita Aglyunys bazneicys i klūstera viesturei.

Trilogejis “Māra mostas” izdavums ir kai veļtejums rakstnīka 110. dzimšonys dīnai, kas tiks atzeimuota rudinī. Gruomotys piecvuordu pīrakstejuse dzejneica i literaturzynuotneica Paulīne Zalāne – Vallena.

Rakstnīks Ontons Rupaiņs dzims 1906. godā Bieržgaļa (niu — Leņdžu) pogosta Pūriskūs solā. Latvejis breivvaļsts laikā struoduojs par školuotuoju, kordirigentu, režisoru. Ūtruo Pasauļa kara beiguos devīs trymdā, dzeivuojs ASV. Pīrakstejs da šam nūzeimeiguokūs i apjūmeiguokūs prozys dorbus par Latgolys viesturi — “Baltie tēvi I — II” (1936 — 1937), “Māra mostas I — III” (1951 — 1956), “Tauta gryb dzeivōt” (1953), pietejumu par senejūs volūdu izaceļšonu “Arheolingvistika” (1967). Mirs 1976. godā ASV, palnu urna puoapglobuota Bieržgaļa kopūs.

Karteņa: rezeknesnovads.lv