Goda beiguos Rēzeknē nūtiks latgalistikys konfereņce

Goda beiguos Rēzeknē nūtiks latgalistikys konfereņce

Francis_kemps30. novembrī i 1. decembrī Rēzeknē nūtiks 9. storptautyskuo latgalistikys konfereņce, kas byus veļteita Fraņča Kempa 140 godu pīmiņai, informej konfereņcis organiziešonys komiteja.

Gaidūt Latgolys kongresa (2017) i Latvejis vaļsts (2018) symts godu svātkus, Rēzeknis Tehnologeju akademeja kūpā ar Latgalīšu Kulturys bīdreibu reikoj vērtini pasuokumu, kab pagūdynuot pyrmuos latgalīšu atmūdys izcyluokūs puorstuovus: Fraņci Trasunu, Nikodemu Rancānu, Fraņci Kempu.

Latgalistikys konfereņcis da šuo jau bejušys: Sanktpīterburgā (Krīveja, 2008), Rēzeknē (Latveja, 2009), Greifsvaļdē (Vuoceja, 2010), Poznaņā (Pūleja, 2011), Reigā (Latveja, 2012), Ačynskā (Krīveja, 2013), Rēzeknē (Latveja, 2014), Viļņā (2015, Leitova). Turpynojūt tradiceju, 2016. godā konfereņce nūtiks Rēzeknē i byus veļteita Fraņča Kempa 140 godu jubilejis pīmiņai.

Konfereņcis temys:
– Latgolys kongresa symts godi, sabīdryskūs i kulturys darbinīku dūtais vaļstiskuma idejis dzymdynuošonā i kaldynuošonā;
– etniskuo, teritorialuo, nacionaluo i c. ideņtitatis, jūs paruodeišona pīrūbeža kulturā i volūdā;
– pīrūbeža kulturu sovstarpeiga īsadorbuošona: puorjimšonys, tipologiskys leidzeibys i atškireibys folklorā, literaturā, plašsazinis leidzekļu telpā, muzeju dorbā;
– IT i muzeja dorbs, humanitaruos jūmys moderniziešonys vareiba;
– latgalīšu volūda zam cytu pīrūbeža volūdu;
– latgalīšu volūdys, nūvoda vuiceibys metodologiskī aspekti.

Dasacejums konfereņcei (pīsadaleituoja anketa i referata anotaceja da 1500 rokstu zeimu, īskaitūt atstarpis) teik gaideits da 2016. goda 20. septembra iz adresa: ilga.suplinska@ru.lv.

Paziņuojums par temys ījimšonu konfereņcis programā tiks izsyuteits da 2016. goda 10. oktobra.

Konfereņcis laikā nūtiks datorspēlis par Latgolys kulturys i sabīdryskajim darbinīkim “Īsapazeisim!” prezentaceja, literari muzykals Andryva dīnys pasuokums, tikšonuos ar pīrūbeža jaunajim muokslinīkim: muzikim, dzejnīkim. Smolkuoka kulturys pasuokumu programa tiks dalykta pi konfereņcis programys.

Konfereņcis dorba volūdys: latvīšu, latgalīšu, angļu, krīvu.
Ka izalaseituo referata prezentacejis volūda ir latvīšu, latgalīšu voi krīvu, prosom sagataveit elektronisku prezentaceju voi kūpsavylkumu angļu volūdā.

Izastuošonys garums: 30 minutys, īskaitūt diskuseju (10 min.).
Konfereņcis daleibys moksa: 40 EUR, studeņtim — 20 EUR.

Laiki:
– 2016. goda 20. septembris — konfereņcis dasacejumu pījimšona;
– 2016. goda 10. oktobris — konfereņcis organiziešonys komitejis atsaceišona par dasacejuma pījimšonu vai napījimšonu;
– da 2016. goda 25. novembra – konfereņcis daleibys moksys īmoksa;
– 2016. goda 30. novembris–1. decembris — konfereņcis nūtikšonys;
– 2016. goda 16. decembris — rokstu padūšona humanitarūs zynuotņu žurnalam „Via Latgalica” (Nr. 8, ISSN 1691-5569, EBSCO, Central & Eastern European Academic Source collection, datu bazē nu 2011. goda);
– 2017. gods — rokstu receņziešona i publiciešona.

Print Friendly, PDF & Email

Kalenders

Jun
16
Svā
all-day Izstuode “Juoņs nu Dzeņagola” @ Latgolys Kulturviesturis muzejs
Izstuode “Juoņs nu Dzeņagola” @ Latgolys Kulturviesturis muzejs
Jun 16 all-day
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]
all-day Jevgenija Bondarenko izstuode “D... @ Latgolys Kulturviesturis muzejs
Jevgenija Bondarenko izstuode “D... @ Latgolys Kulturviesturis muzejs
Jun 16 all-day
Muokslinīks Jevgenijs Bondarenko ir riezeknīts i ar gleznīceibu nūsadorboj nu Latvejis Muokslys akademejis Latgolys filialis absolviešonys 2011. godā. Gleznuotuojs aktivi īsakļaun muokslys dzeivē, pīsadolūt kūpejuos Latgolys muokslinīku izstuodēs i plenerūs. Sovu pyrmū personalizstuodi “Maiguma ārprāts”[...]
all-day Karīnys Ludbuoržys izstuode “Zie... @ Latgolys Kulturviesturis muzejs
Karīnys Ludbuoržys izstuode “Zie... @ Latgolys Kulturviesturis muzejs
Jun 16 all-day
Riezeknīte Karīna Ludbuorža piec garuoka laika pūsma, kod turpynuoja muokslys studejis Vuocejā doktoranturys programā, otkon pīduovoj sovu dorbu izstuodi Latgolys Kulturviesturis muzejā. Muokslineicys jaunuokī dorbi aplīcynoj juos interesi par viesturi i vysaidu pasauļa tautu mitologeju.[...]