Skriejieja Anita Kažemāka Reigys maratonā izpiļdejuse Riodežaneiro Olimpiskūs spēļu normativu 42 km distaņcē. Iz Olimpiskuom spēlem nu Latvejis brauks treis dreizuokuos sportistis, voi Anita Kažemāka byus vīna nu jūs, tū izzynuosim 28. majā, kod normativu raudzēs izpiļdeit Ariana Hilborna, kurei sajāmuse dubultpylsūneibu i ari startej nu Latvejis.

Anita Kažemāka sarunā raidejumā “Kolnasāta” stuosta, parkū daguoja raudzēt ūtrreiz – normativu leidzdaleibai olimpiadei jei gribēja izpiļdeit jau Vīnis maratonā. Taipat Anita stuosta par sūļuotuojis karjeris beigšonu 2013. godā, kod piec pasauļa čempionata Moskovā nūvylka sūļuošonys abavi, kai ari tū, kaids bejs juos ceļš iz olimpiskū sapynu.

Nu Arņs Slobožanins i Valentins Lukaševičs vuordineicā runoj par vuordu, kurū eipaši itūšaļt, kod apdraudāta Krīvejis sportistu pīsadaleišona Rio spēlēs, saista ar sportu i dopinga lītuošonu. Ituos nedelis vuords ir “zeimūgs” aba “štempeļs”.