Latgolys Kulturys centra izdevnīceiba izdavuse Marijis Zujis dzejūļu kruojumu “Latgolas molā”, viestej informaceja izdevnīceibys sātys lopā.

Kruojumā atrūnami 22 dzejūli, kas lelā mārā viestej par autoris dzeivi.

Marija Zuja dzymuse 1940. goda 8. oktobrī niulinejuo Rēzeknis nūvoda Pušys pogostā kai ūtrais bārns pūdnīka Oduma Kuopusteņa saimē. Vuiciejusēs Pušys septeņgadeigajā školā, Maltys 1. vydsškolā, kai ari Latvejis Republikaniskuo Nakluotīnis Lauksaimisteibys tehnikuma agronomejis nūdaļā i LLA Agronomejis fakultatē.

Struoduojuse Valmīrys rajona “Zīmeļu” kolhozā, piečuok Pušys kolhozā. 1989. godā suokuse struoduot sovā zemnīku saimisteibā “Pakalni”. Niu autore ir pensejā i dzeivoj Maltā.

Marija Zuja soka, ka jai niu ir daudz breiva laika, kod puordūmuot dzeivi – vysu, kas radzāts un pīdzeivuots. Struodojūt kolhozā dispečerdīnastā, vajadzēja izdūt sīnys avīzi: tai jei suoce raksteit dzeju, kur tyka izsmīti taidi natykumi kai slynkuošona i dzeršona. Cylvāki skaiteja, nu nazynuoja, kas tūs pantus roksta. Ari niu jei roksta par šudiņdīnys nabyušonom.