Kolnasāta 4. junī

Kolnasāta 4. junī

Kaids sanskritam sakars ar latgalīšu volūdu? Reigā nūteik lekcejis latvīšu i krīvu volūdā, kuruos tū skaidroj. Itū lekceju autors izdevs ari gruomotu, kuruos nūsaukumā Latgolys dzeivuotuoji saukti par “nūlīgtū civilizaceju”. Renāte Lazdiņa runoj ar volūdnīkim i skaidroj itū vaicuojumu.

Par latgalīšu “ezoteriskū” literaturu tū sovā komentarā sauc viesturis magistre, bīdreibys “Latgolys Studentu centrs” projektu vadeituoja Vineta Vilcāne. Jei apsaver ari cytu izdavumu, kurymā teik runuots par latgalim, tūs saucūt par “Latvejis pādejū sentautu”. Komentarā obejus alternativūs redzīņus Vineta sauc par provokaceju, gribiešona atzeit latgaļus par atsevišku etnisku vīneibu škeļ sabīdreibu.

Arņs Slobožanins i Valentins Lukaševičs vuordineicā itū pošu tematu apsaver plašuok i runoj par mitim, aizsprīdumim i stereotipim, kas klejoj pa i par Latgolu.

Nu “Kolnasātys” studejis teik zvaneits iz Kruoslovys nūvodu, kur divejom školom itys vuiceibu gods beja pādejais. Lidejai Miglānei, kurei Kruoslovys nūvodā atbiļdeiga par izgleiteibu i kulturu, teik vaicuots, parkū pījimts lāmums slēgt Kaļnīšu pamatškolu i Skaistys suokumškolu, kai ari, voi Pūleja atroduse leidzfinansiejumu Grafu Plāteru Pūļu pamatškolai, kurū cytaiž gaida taids pats liktiņs.

Kaida ir sajiuta sovys školys pādejā dorba dīnā, teik vaicuots Kaļnīšu pamatškolys direktorei Rutai Livčai.

Print Friendly, PDF & Email