Rēzeknē byus ari medeju i žurnalistikys studejis

Rēzeknē byus ari medeju i žurnalistikys studejis

2016. godā Rēzeknis Tehnologeju akademeja (RTA) planavoj suokt akademiskuos magistra studeju programys “Reģionālie mediji un komunikācija” realizaceju, informej studeju programys direktore Sandra Murinska-Gaile.

Cīši pīpraseituos medeju i žurnalistikys studeju programys da šam varēja vuiceitīs tik augstuokuos izgleiteibys īstuodēs Reigā i Vydzemis Augstškolā. Itūšaļt, jemūt vārā Latvejis medeju politikys nūstuodnis i vajadzeibu styprynuot medeju vidis profesionalizaceju Latgolys regionā, nūteik dorbs pi studeju programys “Reģionālie mediji un komunikācija” sagataveišonys, kab jaunajā studeju godā varātu uzjimt pyrmūs studentus vīneigajā itaida veida programā Latgolā.

Itei byus pyrmuo programa Latvejā, ari Baļtejā, kuruos pamatmierkis ir regiona masu medeju vidis studejis, partū ka itūšaļt informacejis i komunikacejis zynuotnis vierzīnī masu komunikacejis problemys regionā nateik atseviški akcentātys, koč i regionūs vītejī plošsazinis leidzekli vys vēļ ir nūzeimeigi informacejis vidis veiduotuoji.

Studeju programys mierkis ir sagatavēt kvalificātus specialistus dorbam regionalajūs medejūs (sajamamais akademiskais grads ir socialūs zynuotņu magistrs komunikacejis zynuotnē), partū ka strauji maineiguos komunikacejis vareibys i globalizacejis ītekme roda vajadzeibu piec komunikacejis specialistim, kas puorzynoj regiona specifiku i problematiku, muok kritiski i analitiski izviertēt informaceju i puorvolda jaunuokuos informacejis i komunikacejis tehnologejis.

Studeju programys specifiku i atškireibu nu cytom programom pamatoj moduļu sistema, kuruos ītvorūs teik akcentātys divejis nūzaris – latgalistika i medeju studejis. Programys pamatu veidoj latgalistikys moduļs, kab izprostu i apsazynuotu regiona situaceju, specifiku i vajadzeibys. Tys ītver padzilinuotu vītejuos latgalīšu žurnalistikys, volūdys, literaturys i folklorys vuiceišonūs. Programa ir vārsta iz Latgolys regiona izpieti i analizi, kas veidoj pamatu regiona medeju studejom. Itys moduļs paradzāts studentim, kas sajāmuši bakalaura gradu socialajuos zynuotnēs. Sovukuort medeju studeju moduļs – studentim, kas sajāmuši humanitarū bakalaura gradu i gryb vuiceitīs studeju kursus medeju organizaceju vadeibā, medeju psihologejā, planavuošonā i mārketingā. Programys eistynuošonā pīsadaleis RTA, Vydzemis Augstškolys, Biznesa augstškolys “Turība” vuiceibspāki, kai ari masu medeju eksperti i profesionali, kas puorstuov kai vītejūs, tai nacionalūs masu medejus.

Obeju moduļu realizacejā nūzeimeiga lūma teik pīškierta inovaceju izmontuošonai medeju i tūs satura veiduošanā, partū studenti pastyprynuoti vuiceisīs medeju dizaina i tehnologeju teņdeņcis RTA Multimedeju studejā, kas itūšaļt teik īkuortuota i dataiseita tam, kab studenti varātu realizēt vysaidus medeju projektus.

Karteņa: pixabay.com

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]