15. junī 15.00 Latgolys Kulturviesturis muzejā Rēzeknē tiks atkluota Māra Čačkys grafikys dorbu izstuode “Nenoteiktie, noteiktie un pateiktie”. Izstuode byus apsaverama da 24. juļa.

Kai roksta muokslys zynuotnīks Valentins Petjko, “Nenoteiktie, noteiktie un pateiktie” ir dorbu cyklys, kas atspīgeļoj autora jaunuokū veikumu kai sova veida muokslinīka atsamūsšonu pavasaram aba atskaiti par izdūmuotū dūmuos i nūsapynuotū sapynūs, pasaceitū i reizē napasaceitū. Māris Čačka ir dažaids izpausmu vaicuojumūs, tok uzticeigs saturam, reizem izbuozeigai atguodynojūt par padūmojamū, nu na vysim saprūtamū. Pavasara duorzs, kas ocu skatīņam pasaver car aprosojūšu lūgu, ir tikpat naskaidrys i izplyuds kai rudiņa leitainuos dīnys atspulgs iz sīnys; ari itūreiz Māra Čačkys radeitais pasauļs ir nūslāpumains – gribīs saredzēt koč kū vaira, tok na vysod izadūd!

Tai kai Mārim Čačkam nav sveša gleznīceiba, ar kurū jis suocs sovu rodūšū ceļu akvareļūs, akrila i ellis dorbūs, tehniski gleznīciskī pajiemīni i kolorits kotru šaļti ir kluotynasūšs juo kruosainajuos i daudzsluoņainajuos grafikuos. Itūreiz autors skateituoju puorsteidz ar materialu, izavielejūt audakla apdruku i kai izteiksmi sev tyvu grafikys tehniku augstspīdumu.

Koč i itamā serejā apsaveramī dorbi pyrmajā šaļtī ruodīs abstrakti, absurdi i naizprūtami, verūtīs tūs tyvuok, var redzēt naskaidrū i izplyudušū nanūteikteibu, kas mejās ar dažaidu tālu siluetim i autoram tyvū socialū temu i tuos nūteikteibu atbluozmi, kas kūpumā veidoj pasaceitū. Ari da šam Māris Čačka sovūs dorbūs raudzeja runuot par vidi i sabīdreibu, dasadurūt pi dzeivis nūtikšonu i tūs attāluojumu izstuodēs Latvejā i uorvaļstīs. Juo daiļradē pādejūs godūs nūzeimeigu vītu ījam cylvāks, leidzeigais i dažaidais, celi kai vide, kai ritiejums i vidis ainova, kai ceļuojums, kai rūtaļa i spēle storp sevi i īsaisteitū skateituoju…

Māris Čačka dzims 1976. godā Varakļuonūs. Muokslinīks grafikis, muokslys pedagogs. Latvejis Muokslinīku savīneibys, bīdreibys “Grafikas kamera”, bīdreibys “Mākslu pedagogu apvienība” bīdrys. Absolvējs Daugovpiļs Pedagogiskū universitati. Itūšaļt ir Daugovpiļs Marka Rotko muokslys centra DMRMC vadeituoja vītnīks, ekspoziceju i muokslys izstuožu kurators Daugovpiļs Marka Rotko muokslys centrā. Vadejs i organizējs vaira par 30 muokslys projektu. Pīsadalejs vaira par 50 muokslys izstuodēs, nu kuru 9 ir personalizstuodis i 9 dubultpersonalizstuodis.

Attālā: Māris Čačka “MC”, augstspīdums, 100×100, 2015