23. junī Vyšku breivdobys estradē nūtiks Daugovpiļs nūvoda vierīneiguokais Juoņu pasuokums, kas itūgod paradzāts ļusteigā kolhoznīku gorā, atguodojūt godus, kod itī svātki beja oficialajai varai navālami, nu tautā vys vēļ svieteiti, informej nūvoda pošvaļdeibys agenturys TAKA puorstuovi. Pasuokums suoksīs 20.30, nu bals – 22.30. Īīšonys moksa – 3 eiro, ar vaiņucenim – 2 eiro.

Pat vysborguokajūs padūmu varys godūs Juoņu svieteišona turpynuojuos – klusuok voi cīšuok, viļteigai svātkus puorsaucūt voi atkluotai gūdā ceļūt – i tei beja zeime, ka tautys dzeivuo guņteņa nav apdzysuse. Partū Daugovpiļs nūvoda pošvaļdeibys agentura TAKA gryb svātku teatralizātajā izvadumā paruodeit, kai itūs svātkus svieteja kolhoznīki. Natryuks ni jūku, ni jautru izdareibu, koncertu kuplynuos grupys “Pankūkas (Inga i Normunds)” i “Latgolys dāmu pops”, Santa Kasparsone, TDA “Līksme”, Agate Jermaļonoka, VIA “Mažors”, AIK “Romaškas”. Piec saulrīta Jurs Ostrovskis aicynuos iz zaļumbalu ar “Dvinskas muzikantim”.

Byus ari omotnīku i sātys ražuotuoju tierdzeņš, zuoļu tierdzeņš, kolhoza prīšksādātuojs pacīnuos ar ols gluozi i sīra škēli, byus daeimamys pīpyušamuos atrakcejis.