Zīmeļlatgolā nūtiks IV Storptautyskais tautys deju festivals “Eima, eima”
Nu 1. da 4. juļa Bolvūs, Ruguojūs i Viļakā nūtiks IV Storptautyskais tautys deju festivals “Eima, eima”.
2016. goda festivala programu gatavej 15 tautu deju kolektivi nu Bolvu apriņča (Ruguoju, Baļtinovys, Viļakys i Bolvu nūvodu), daleibu dasacejuši uorzemu kolektivi nu Serbejis, Pūlejis, Čehejis, Slovakejis, Igaunejis i Latvejis kolektivi – TDA “Daiļrade”, divejis Lubuonys deju kūpys, Feimaņu pogosta kulturys noma jaunīšu deju kolektivs “Vīmyns”, Ludzys kulturys centra senioru deju kūpa “Atvasara”. Festivala laikā paradzātys Ivetys Gabrānis meistarklasis par Zīmeļlatgolys tautys tārpu, tuo volkuošonys tradicejom, taipat latgalīšu deju meistarklasis kūpā ar Rēzeknis kapelu “Dziga” i horeografu Ilmāru Dreļu.
Festivala laikā nūtiks koncerti Ruguoju, Viļakys i Bolvu estradēs, taipat ari gostu kolektivu izbraukuma koncerti Bolvu pansionatā, Veiksnā i Kubulūs. Piec festivala lelkoncerta Bolvu piļsātys estradē 2. julī byus ari zaļumbals ar kapelu “Dziga”.
