Fondu “1836” i “Viegli” draugi koncertēs Upeitē

Fondu “1836” i “Viegli” draugi koncertēs Upeitē

25. i 26. junī Viļakys nūvodā byus guojīņs nu Žeiguru da Upeitis, kas nūtiks fonda “1836” ceļa “Aplido, apceļo, apmīļo Latviju!” ītvorūs. Guojīņs suoksīs sastdīnis reitā Žeigurūs, kur ceļuotuojus sagaideis Meža lobumu cīma mārga ar paleigim. Pyrmajā dīnā dalinīki dūsīs da Medņovys (Semenovys), kur nakšņuos školā, nu ūtrajā dīnā īs atlykušū ceļu da Upeitis. Svātdiņ, 20. juņa vokorā, 18.00 Upeitis parkā “Ontona Slišāna duorzs” nūtiks fonda “1836” i fonda “Viegli” draugu bezmoksys koncerts, kurymā pīsadaleis ari apbolvuojuma “Laiks Ziedonim 2014” laureats Andris Slišāns ar saimi.

Par gūdu Latvejis symtgadei fonds “1836” veidoj turisma maršrutu apleik Latvejai, kas byus apmāram 1836 kilometru garumā pa sauszemis rūbežu. Turisma ceļš “Aplido, apceļo, apmīļo Latviju!” planavuots kai duovona Latvejai i tuos dzeivuotuojim vaļsts symtgadē. Vyss maršruts tiks sadaleits symts 18,36 kilometru garūs pūsmūs, kū veikt, braucūt ar mašynu, ritini voi staigojūt.

Kotrys dalinīks, kurs pīsadola itymūs guojīņūs, īsaguodoj eipašu pasi, kurymā kruoj zeimūgus par nūītajim ceļa pūsmim. Nedeļgolu puorguojīņūs īspiejams sajimt kotra nūvoda eipašū zeimūgu. Guojiejim, kurī pīsadaleis Viļakys nūvoda pūsmā, juojam leidza ari elektroniskuo identifikacejis karte (ID) voi pase, partū ka itys ceļš vad gar Latvejis rūbežu.

Guojīņs nu Žeiguru iz Upeiti byus jau pīktais pūsms itymā ceļā, nu maja vyda projekta autori ar draugim paspiejuši gasteit Kūrzemis i Vydzemis jiurmolā i Latgolā, kod devēs ceļā nu Rekovys da Malnovys, nūeimūt jau pyrmūs 160 km i ībadūt pyrmuos ceļa nūruodis, kū veiduojuši muokslinīki Velga Vītuola i Gaitis Burvis, Kolkys rogā, Kuorsovā i Salacgreivā. Ceļa “Aplido, apceļo, apmīļo Latviju!” guojīņūs var pīsadaleit sevkurs interesents, nūeimūt sev vālamū ceļa gobolu, koč tik vīnu dīnu, puors kilometrus. Guojīņu nūslāgumā svātdīnēs parosti ir koncerti, kurymūs pīsadola fonda “1836” i fonda “Viegli” draugi, kai ari teik ībasts eipašais ceļa stobs, kas ruodeis vierzīni cytim ceļuotuojim.

Turisma ceļš apleik Latvejai sadaleits četrūs simboliskūs pūsmūs: Pījiurys ceļš – nu Rucavys da Ainažu, Zīmeļmeitys ceļš – nu Ainažu da Muorkaļnis, Muorys ceļš – nu Muorkaļnis da Demenis i Leišmaleite – nu Demenis da Rucavys. Viļakys nūvoda pūsmys īkļauts “Aplido, apceļo, apmīļo Latviju!” Muorys ceļā.

Guojīni nūteik nedeļgolūs, nasaverūt iz tū, voi ir saule voi leits, partū ka mierkis ir īpazeit Latveju, tuos dobu i kulturviesturiskuos vierteibys vysaidūs laikapstuokļūs. Ceļa dalinīku sabīdruotī ir na tik satyktī ceļa bīdri i sarunys, nu ari dzīsmis i vītejī dzeivuotuoji. 2016. goda guojīni nūtiks da septembra vyda, nu tod atsasuoks 2017. goda pavasarī.

Da Latvejis symtgadis planavuots izveiduot atbylstūšu ceļuošonys infrastrukturu ar apsamesšonys, izklaidis i atpyutys vītom.

Print
Print
Print Friendly, PDF & Email

Nūtikšonu kalendars

Apr
14
Tre
12:00 Gundegys Rancānis gleznu izstuod... @ Latgolys Kulturviesturis muzejs
Gundegys Rancānis gleznu izstuod... @ Latgolys Kulturviesturis muzejs
Apr 14 @ 12:00 – May 8 @ 18:00
Gundegys Rancānis gleznu izstuode "Klātesot" @ Latgolys Kulturviesturis muzejs
Nu 14. apreļa da 8. maja Latgolys Kulturviesturis muzeja lūgu vitrinuos ir īspieja apsavērt muokslineicys Gundegys Rancānis gleznu izstuodi “Klātesot”. Karteņa: rezekne.lv